Shillong, Naitung 09
Ka Meghalaya ka la lah ban kynthup ïa palat 61% na ki nongthep ‘vote’ jong ka hapoh ka Special Intensive Revision (SIR) 2026, bad na ka liang ka Election Commission ka dang bteng haba ïadei bad ka jingpynshisha da kaba rung sha man la ki thliew ïing ha baroh 12 tylli ki distrik jong ka Jylla.
Katkum ka ‘Status Report’ ba la pyllait da u Chief Electoral Officer (CEO) ha ka step Sngi Palei, la ong ba la dep ban sam 14,43,818 tylli ki ‘Enumeration Form’ haduh mynta na ka jingdon ki nongthep ‘vote’ baroh kaba long 23,49,645 ngut – kaba kot sha ka 61.45% ki nongthep ‘vote’.
Kiba dang sah, kata 9,05,827 ngut ki nongthep ‘vote’ – 38.55%, ki dang hap ban ïoh ïa ki phom jong ki.
Ïa kane ka sienjam la leh da 3,551 ngut ki Booth Level Officer (BLO), ha kaba uwei-pa-uwei u BLO u khmih haduh 407 tylli ki phom.
Ka jingdon jong ki nongthep ‘vote’ na ka bynta uwei-uwei u BLO ha ka Jylla ka long 661.69.
Ha kajuh ka por, ka lad pynïasoh ‘digital’ ban lum ïa ki phom ruh ka la sdang, ha kaba 1,98,307 tylli ki phim, lane 8.44% na ki nongthep ‘vote’ baroh, ki la dep ban pynïasoh sha ka rukom treikam.
Ki jingkheiñ katkum ki distrik ki pyni ruh ïa ka jingïapher kaba khraw kaba dang ïaid.
Ka South West Garo Hills ka la paw kum ka distrik kaba hakhmat eh haba ïadei bad kane ka kam, kata da 88.36% na ki 1,08,883 ngut ki nongthep ‘vote’ jong ka, bud sa ka North Garo Hills – 77.96% bad ka West Jaiñtia Hills – 72.16%.
Ka East Garo Hills bad ka Ri-Bhoi ruh ki la tam ïa ka 67%.
Ha kawei pat ka liang, ka East Jaiñtia Hills ka la sakhi ïa kaba duna tam ha kaba ïadei bad kane, kata 42.87%, ha kaba 44,764 na ki 1,04,417 ngut ki nongthep ‘vote’ ki la ïoh pdiang ïa ki phom.
Ka East Khasi Hills, ka distrik kaba heh tam jong ka Jylla, kaba don 6,32,146 ngut ki nongthep ‘vote’, ka la kynjoh sha ka 53%, katba ha West Garo Hills ka long 56.32%.
Kiwei pat ki distrik kiba kynthup ïa ka South Garo Hills, Eastern West Khasi Hills, South West Khasi Hills bad West Khasi Hills ki don hapdeng ka 58 bad 63%.
Ka kaiphod ka pynpaw ruh ïa ki jingïapher haba phai sha ka liang ki lad ‘digital’.
Ka South West Khasi Hills ka lamkhmat da 17.88% haba ïadei bad ki phom ba la phah lyngba ki lad ‘digital’ bud sa ka Eastern West Khasi Hills – 16.66% bad ka South Garo Hills – 15.08%, katba ka West Jaiñtia Hills ka dei kaba duna tam, kata 1.92%.
Ka North Garo Hills ka dei kaba bun eh ka jingbynshet kam na ka bynta uwei-uwei u BLO, kaba long 816.75 ki nongthep ‘vote’, katba ka South West Khasi Hills pat ka don tang kumba 563.58 ngut.
Ki BLO ka South West Garo Hills ki la sam mar 573 tylli ki phom, katba ka East Jaiñtia Hills pat ka sakhi ïa kaba duna tam, kaba long 285 tylli ki phom na ka bynta uwei-uwei u BLO.
Ka Special Intensive Revision (SIR) ka dei shi bynta jong ka jingthmu ka Election Commission of India ban pynthymmai bad pynkhuid ïa ka thup kyrteng ki nongthep ‘vote’ hashuwa jong ki ilekshon ban wan.
Shuh shuh u CEO u la kyntu ïa ki nongshong shnong ban ïatreilang bad ki BLO ha ka por ba pynshisha bad la pynbiang ruh ïa ka ‘ECINET’ bad ka ‘Voter Helpline Mobile Application’ na ka bynta ban khmih ïa ki jingtip ba bniah bad ka jinglong-jingman.
