Shillong, Naitung 09
U Myntri ka tnad Animal Husbandry & Veterinary, u Bah Sanbor Shullai u la bthah ïa ka Border Security Force (BSF) ban sdang mardor ïa ka jingkhynra halor ki jingkynnoh khaïi tuh ïa ki masi ha West Garo Hills, hadien ba la mih ki khubor ba ka don ka jingshalan be-aiñ ïa ki masi sha khappud Bangladesh.
Ha ka shithi sha u IG ka BSF Meghalaya Frontier, u O.P. Upadhyay, u Bah Shullai u la kdew ïa ki khubor ba la mih ha ki lad pathai khubor halor ka jingkhaïi masi be-aiñ ba khlem ka jingpeitngor na Assam sha khappud Bangladesh lyngba ka West Garo Hills bad u la kyntu ïa ka jingtuklar ba mardor na ka liang ki ‘Border Outpost’.
“La kyrpad mardor ba ki BSF Outpost bad ki shipai jong ki, kiba long ki nongker-nongda bad nongpahara ha khappud ba kin sngewbha ban shimkhia mardor ban leh eiei bad ban bthah ban shim ïa ki lad ki lynti kiba tyngeh ban peitngor ïa ki kam be-aiñ ba la kdew haneng,” la thoh u Myntri.
U la pynpaw ruh ïa ki lynti ïaid ba kyrpang ba la kdew ha ki khubor, da kaba ong ba “la kynnoh ba ki ïaid lyngba ka Chibinang & Tura bad nangta sha Chirangpara.”
Ka shithi ka la kynnoh ruh ïa ka jingkhaïi tuh kaba la saphriang bad ka jingleh be-aiñ ïa ki mrad ha kine ki lynti.
U Bah Shullai u la kyrpad ïa u IG ban pyntip sha u haba ïadei bad ki sienjam ba la shim halor kane ka bynta.
