Shillong, Naitung 09
Ka Hynñiewtrep Integrated Territorial Organisation (HITO), Dawki Border Area Circle, ka pynpaw ïa ka jingsngewkhia kaba jur halor ka jingdheng kali ha surok Dawki, hadien ba ka seng ka la ïoh pdiang bun ki jingujor na ki paidbah, halor ka jingdon jong ka jingpynsangeh bad jingsahkut kali ha katei ka thaiñ.
Ha ka jingïalam jong u President, u Bah Wanbor Lamin, ki nongïalam ka seng ki la hiar sha ka jaka ban jurip da la ki jong ki khmat bad ki la lap ba ka jingshisha ka long kumba la ujor da ki paidbah.
Ha kane ka sngi, ka seng ka la ïakynduh ruh ïa ki katto katne ki dkhot jong ka Association Truck Riwar Mihngi, ban ïakren halor ka rukom pynïaid ïa ki trok kit maw, khnang ba kan ym don ka jingthut ïa ka leit ka wan jong ki paidbah.
Ka HITO ka kyntu ïa ki trai trok, ki kynhun shnong, ki Association jong ki trok bad ki pulit, ba kin ïatreilang ban pynbeit ïa ka rukom pynïaid kali, khnang ba ka leit ka wan lyngba ka surok Dawki, kan long kaba suk bad kaba ïaid beit ïaid ryntih.
Ka seng ka maham ruh ïa kino-kino kiba pynlong ïa ka jingpynsahkut kali khlem ka nongrim kaba dei ne da ka rukom kaba pynwit ïa ki paidbah.
Da kaba bynrap, ba lada ka HITO ka lap ïa kum kine ki jingjia, kan ym ailad, hynrei kan shim ïa ki sienjam kiba tyngeh katkum ka bor bad ka bynta jong ka.
