Shillong, Naitung 09
Ka Kynhun Myntri ka jylla Meghalaya ha ka sngi Palei ka la mynjur ïa ka jingpynkylla ïa ka jingïateh kular ban ailad ïa ka Orchid Resort, Mawkasiang kaba don ha New Shillong ban kyntiew kyrdan noh sha ka jaka jngohkai kaba don ha ka kyrdan 5 star hotel.
Hadien ba la wai ka Kynhun Myntri, u Myntri Rangbah ka Jylla u Conrad K Sangma u la ong ba kane ka jingtyrwa ka la wan hadien ka jingkyrpad na ki nongshong wai ba mynta ban bei tyngka shuh-shuh bad ban kyntiew ïa kane ka jaka.
U la ong ba u nongpynïaid shimet mynta u la pynpaw ïa ka jingangnud ban pynpoi ïa ka jaka jngohkai pyrthei sha ka kyrdan 5-star.
Ban pynsuk ïa ka jingpynbha, ka Kynhun Myntri ka la rai ban pynkylla ïa ki kyndon jong ka jingaiwai ha ki laiñ kiba ïadei bad kiba la ai sha kiwei pat ki projek hotel 5 star ha ka Jylla.
Katkum ki kyndon ba la pynkylla, u nongshimwai un hap ban thep pisa shisien bad ban ïasam ïa ka khajna bad ka Jylla.
“Kaba long ha ka nongrim ba ki hap ban buh ïa ka pisa kaba T.5 klur, ka pisa kaba shisien buh, bad kumjuh ruh 4% na ka jingmih baroh kawei hap ban ai sha ka Sorkar Meghalaya, sha ka MTDC”, u la ong.
U Conrad u la bynrap ba ïa ka jingmynjur ba khatduh na ka bynta ka jingpynkiew kyrdan 5 star yn sa ai ynda la pdiang ïa ki kyndon thymmai.
Kumta u la ong, ki kyndon kin long shi bynta jong ka jingïateh, bad ynda ki la pdiang ïa kata, yn ai jingbit ban kyntiew sha ka jaka jngohkai pyrthei kaba don ha ka kyrdan 5-star sha kiba shimwai”, u la ong.
