Shillong, Naitung 09
U Myntri Kam Pohïing ka Sorkar Pdeng u Amit Shah u la pynthikna ïa ki nongïalam Balang na kane ka jylla Meghalaya bad ka thaiñ Shatei Lam-Mihngi ban bishar bniah biang ïa ka Foreign Contribution (Regulation) Act 2019.
Haba ïakren bad ki nongthoh khubor, u Myntri Rangbah ka Jylla Conrad K Sangma u la ïathuh ba ka jingïakynduh ïa u Amit Shah ha Delhi ka long kaba don jingmut namar u la kular ban sa bishar bniah biang.
Ïa kane ka jingleit ïakynduh ki nongïalam niam ïa u Amit Shah ka dei lyngba ka jingïalam u Conrad K Sangma kiba la leit ban kyrpad ïa u ban pynbeit thymmai biang ïa kane ka FCR Act.
“Ki jingïakren ki long kiba seisoh shibun ha ka jingsngewkhia kaba la pynpaw da ma ngi bad u Myntri kam pohïing u la shim khia ban batai ïa baroh ki liang”, la ong u Conrad.
U la pyntip ba u Shah u la pynthikna ban buddien bad khot ïa ka jingïamir jingmut kaba kham jylliew halor kane ka bynta.
“U la pynthikna ïa ngi ba un leit sha kawei pa kawei na kine ki mat, un ïakren bad un wan biang sha ngi ryngkat bad ka jubab. U la kular ruh ban khot ïa ki nongïalam Balang bapher-bapher na ka thaiñ Shatei Lam-Mihngi ha ki ar taïew ban wan, ha kaba u Home Secretary un shong bad ki nongïalam Balang bapher-bapher bad un sngap ïa ki jingeh jong ki, un pynbeit ïa ki jingeh jong ki,” u la ong.
“Hadien ba la buh ïa ka jingkyrpad na ka liang jong nga ban ïoh ïa ka jingshai kaba kham bniah, u Secretary kam pohïing u lah ban khot ban ïakren kham jylliew hadien kumba 10 sngi haduh 14 sngi, ban sa shah khot biang sa shisien sha Delhi na ka bynta ban ïakren kham bniah,” ong u Conrad.
