Shillong, Naitung 10
Ka Federation of Khasi Jaiñtia and Garo People (FKJGP) bad ka Khasi Students’ Union, Upper Shillong Circle ka la buh jingkylli ïa ka Sorkar Jylla haba ïadei ka jingpynmih ïa ka ‘Ordinant’ ban pynlong ktien Sorkar lane ‘Official Language’ noh ïa ka ktien Khasi bad Garo nalor ka ktien phareng.
Kum ban shu kdew ka Sorkar Jylla lyngba ka kynhun Myntri ka la ai jingmynjur ne jingithuh ïa ka ktien Khasi bad Garo ba kan long noh ka ktien Sorkar naduh ka 27 tarik u Ïaïong 2026.
U Bah Kitboklang Nongphlang u President ka FKJGP Upper Shillong Circle u la kynthoh ba ka Sorkar haduh kine ki sngi ka khlem pat pynmih ïa kino-kino ki jingpynbna paidbah ha ka ktien Khasi, hynrei ka dang ïai bteng ban pynmih ïa ki jingpynbna ha ka ktien nongwei.
Haba ïadei kane ka bynta ka FKJGP bad KSU kiba don ha ka Joint Co-ordination Committee ka la phah jingthoh da ka ktien Khasi ha ka jingleit ai dorkhas sha u Director ka tnad Urban Affair u Prafulla Kumar Boro (MCS) u bym dei na ka jaidbynriew Khasi.
U Bah Kitboklang u la kdew ba kane ka jingaiti jingthoh ka JCC sha ka tnad Sorkar da ka ktien Khasi ka long kum shi bynta ban pyntreikam bad ban pynthikna ba la ka Sorkar ka la pyntreikam ne em ïa kane ka ‘Ordinant’ ba ka la dep ban ai jingmynjur.
Shuh-shuh u Bah Kitboklang u la ong ka jingmynjur ïa ka ‘Ordinant’ ka la ïaid haduh lai bnai, hynrei ym pat ïohi ba ka Sorkar kan pyntreikam, namar kata u la buh jingkylli ïa ka Sorkar Jylla ba hato ka jingpynbna ba la ithuh ïa ka ktien Khasi bad Garo kum ki ktien Sorkar ka dei tang ka jingpynbiej ilekshon.
U la ban jur da kaba kyntu ïa ka Sorkar Jylla ba ka dei ban pyntreikam pura ïa ka ‘Ordinant’ kumba la mynjur da ka kynhun Myntri bad ka dei ban pyntreikam katkum ka rai ba ka la dep ban shim, khnang ba kan long ka jingmynroi ïa ki paidbah kiba wan na ki thaiñ nongkyndong bad kiba kwah ban ai jingmut bad ban pynsngew ïa kino-kino ki jingeh ki jong ki sha ka Sorkar
