Shillong, Naitung 10
Ka Hynñiewtrep Youths’ Council (HYC) ka la dawa ban pyntreikam mardor ïa ka Special Anti-Drug Enforcement ban ïakhun pyrshah ïa u drok ha baroh ki jaka ba la ithuh kum ki jaka ba jyllei drok ha nongbah Shillong, da kaba kdew ïa ka jingma kaba jur bha jong u drok ïa ka imlang sahlang.
Ha ka kyrwoh, u President ka HYC Bah Roy Kupar Synrem u la dawa ba ki pulit ki dei ban ïaid pahara man ka por ha ki jaka ba jyllei drok, ban leh tyngeh ïa ki nongkhaïi drok, bad ban don da ka Plan kaba shai ban pynshngaiñ biang ïa ki jaka paidbah na u drok bad na ki kam runar.
Ka HYC ka la pynrem jur da kaba kynnoh ba ka jingbym leh eiei ka Sorkar kala pynjyllei ïa ka kam khaïi drok ha Shillong, khamtam ha Police Bazar, GS Road, Lum Survey bad ki jaka ba marjan ha kaba la ïathuh ba ki nongdih bad ki nongkhaïi drok ki pynïaid ïa ka kam be-aiñ khlem jingtieng ïa ka aiñ ne ïa ki paidbah.
“Ka khubor ba dang shen ba la paw ha ki lad pathai khubor kaba pynpaw kumno ki jaka khaïi pateng ki shah pynthut, ki nongthied ki shah beh, bad ki jaka paidbah ki kylla long ki jaka dih drok bad ki kam pyrshah ïa ka imlang sahlang bad kane kala kylla long ka jingmaham kaba jur ba ka jinglong jingman ha Shillong ka la don jingma,” ong ka HYC.
Ka HYC ka la kynnoh ba ki nongkhaïi, ki nongdie jingdie, ki kynthei, ki khynnah bad ki nongshong shnong ki shah pynbor ban im bad trei hapoh ka jingtieng katba ka Sorkar ka dang ïai bteng ban long kum ka nongpeitkai kaba sngap jar.
“Ka jingpyndonkam paidbah ïa ki drok haba shit ba shai, ka jingdon jong ki nongdih drok ha khmat ki dukan bad ki jaka khaïi, bad ka jingshah pyndik, jingshah tuh bad jingshah pyntieng pynsmiej ba la ïathuh da ki nongdie dukan kiba ïakynduh man ka sngi, ka pyni shai ba kane kam dei shuh ka jingeh kaba ha rieh hynrei ka dei ka jingeh kaba pyni ba ka nongbah ka don hapdeng ka jingbym don aiñ,” ong ka HYC.
Da kaba kynthoh ba ka Sorkar Jylla, ka tnad Kam Pohïing bad ki bor ka aiñ ki dei ban shim ïa ka jingkitkhlieh ba ki ailad ïa kane ka jingma ban saphriang khlem da peit bniah, ka HYC ka la ong ba ka jingbym lah ban tehlakam ïa ki jaka ba la tip kum ki jaka ba jyllei drok ka pyni ba ka Sorkar kam don jingkitkhlieh ban weng ïa kine ki jingeh kiba mih namar ba jyllei u drok.
