Shillong, Naitung 10
U Myntri ka Sorkar Jylla, u Bah Sanbor Shullai uba dei ruh u nongïalam ka Meghalaya BJP, u la pynrem jur ïa ka Voice of the People Party (VPP), namar ka jingpyrshah ïa ka jingwan u Myntri Rangbah ka Assam u Himanta Biswa Sarma sha ka lehniam Behdeiñkhlam bad kynthoh ba kane ka jingleh kane ka party ka da i jah burom shisha.
Lah ban kdew ba u Himanta u la wan sha kane ka jinglehniam ha Jowai kum u nongshah khot sngewbha ha ka Seiñraij, Jowai ba un long kum u Kongsan.
Kiba la donlang ha kane ka lehniam Behdeiñkhlam ki kynthup ïa u Symbud Myntri Rangbah ka Jylla, u Bah Sniawbhalang Dhar, u MLA ka thaiñ bad kiwei-kiwei de.
Haba kren sha ki lad pathai khubor u Bah Sanbor u la ong “Hooid, ngi sngew jahburom ba ka party VPP ka la pyrshah ïa ka jingwan u Myntri Rangbah ka Assam u Himanta Biswa Sarma kum u Kongsan ban sakhi ïa kane ka ka lehniam bad ka tamasa kaba heh duh jong ka jaidbynriew Pnar. Nga ruh nga la ïadonlang bad u”.
U Bah Sanbor u la ong ba ka jingpynïasoh ïa kane ka jingwan jong u Himanta bad ki kam ïakajia pud kadei kaba bakla shibun.
“Nga sngewthamula ba ki kynnoh ba u Himanta Biswa Sarma u dei ban pynbeit ïa ka kam kajia pud. Ka bym don jingïasnoh bad ka kam kajia pud halor ka jingwan jong u,” u la bynrap ba watla ka kynhun ka don ïa ka hok ban pynpaw ïa ka jingsngewkhia halor ka kam khappud, hynrei ban wan ïakhih ha ki jinglehniam na la tynrai kadei ka bym ïahap satia.
“Mano mano ruh, ki riew shimet, sengbhalang lane seng saiñ pyrthei, ki don ïa ka hok ban kren ïa kano-kano ka ishu, hynrei kim dei ban pyrshah ïa ka jingwan jong u sha ka lehniam kum u Kongsan. Kam don jingïadei satia bad ka kam khappud” u la ong.
U Bah Sanbor u la ong ba halor ka kam khappud, ki la don ki Committee, kiba la thaw da ka Sorkar. Lada ki don kano-kano ka jingai jingmut lane kano-kano ka jingpyrshah, da ka jingthoh, ki dei ban leit ai sha ka Sorkar lane sha kine ki Committee.
“Ngi sngew thamula ba ka seng saiñ pyrthei kum ka VPP, ka la kren ïa kine kiei-kiei, ka bym lah satia ban pdiang da ki paidbah jong ka Jylla” bynrap biang u Bah Sanbor.
