Shillong, Naitung 12
Ka Khun Hynniewtrep National Awakening Movement (KHNAM) ka sngewkhia haba ïadei ba la donkam ban pynbeit thymmai ïa ka Scheduled Tribes (ST) Order, 1950 da kaba kdew ba ki la bun palat ki kyrteng jong ki jaidbynriew (Tribes) kiba don ha ka thup jong ka Jylla.
Haba kren sha ki nongthoh khubor u Working President ka KHNAM u Bah Thomas Passah u la pynpaw ba ka party ka la ju dawa bad ka la ju phah ki jingai jingmut sha ka Sorkar ba ka la dei ka por ba peit bniah bad ban pynthymmai ïa kane ka mat.
Shuh-shuh u la ong, ka jingbun jong ki jaidbynriew bapher-bapher hapoh ka Jylla, ka bhah thungkam kaba dei ban ïoh u jaidbynriew rit paid ha ka Jylla ka duna namar ba hap ban ïasam bad kiwei ki jaidbynriew.
Haba ïadei ka jingdawa ki jaidbynriew Tiwa (Lalung) ban kynthup noh ïa ka jaidbynriew (Tribe) jong ki, ha ka Presidential Order 1950 lane ka Scheduled Tribe Order, 1950. U Bah Passah u la ong ba kum ïa kine ki jingdawa ymdei ban pdiang bad ban jur ba la dei ban peit bniah lane ban pynthymmai ïa ka ST Order 1950.
Haba batai, u la kdew ba ka Ministry Home Affair ka Sorkar India ha u snem 1975 ka la kren shai, ba kino-kino ki jaidbynriew rit paid kiba wan sah ha ka Jylla Meghalaya kin ym lah ban ïoh ïa ka jingmyntoi u Khasi-Jaiñtia bad u Garo. “Phin ymlah ban ïoh ïa ki jingmyntoi tang na kaba wan sah ha ka Jylla bad na kaba ïashongkha” u la ong.
Haba bynrap ïa kane ka jingdawa jongki jaidbynriew Tiwa u la pynshai ba ki lah ban ïoh ïa ki jingmyntoi na ka ST tang ha ka Jylla ba shong kito ki jaidbynriew, hynrei ban dawa ïa ka jingituh lane jingmyntoi ha ka Jylla Meghalaya ka long kaei-kaei kaba bakla.
