Ha ki snem kiba mynshwa, la ju ong ba ka Meghalaya ka dei tang ka lynti ïaid ban pynpoi ïa ki drok bapher-bapher sha kiwei pat ki bynta jong ka Ri. Hynrei kat nang ïaid ka por, kane ka la kylla namar kam dei shuh tang ka lynti ïaid, ka la dei syndon ka jaka shongneh jong u drok. Ïa kane ngi lah ban sngewthuh na ki jingkheiñ jingdiah ba la ai da ki pulit ha kaba ha kine ki khyndiat snem kiba la leit, la ïoh ban kem ïa ki spah ngut ki briew bad ban kurup ïa u drok uba shongdor da ki spah klur tyngka. Watla na ka liang ka tnat pulit ka la ïakhun tyngeh hynrei lada ym don ka jingïatreilang bad ka mon nalade jong kito kiba pyndonkam ïa u drok, ka long shisha kaba eh ban pyllait ïa ka jylla na ka jingkyrni ha u drok.
Ka jingjyllei jong ki nongdih drok hapoh ka jylla ka la long shisha kaba ima bad ishyrkhei bha namar ym tang ba ka jingjyllei jong u drok ka ktah ïa ka imlang sahlang hynrei ka pynshongsyier ruh ïa kiwei pat. Ngi sakhi na kawei ka sngi sha kawei pat, ka jingkiew jong ki kam tuh kam thiem kaba la ishyrkhei shisha, haduh ba ki nongtuh kim map shuh satia wat ban ïoh tuh ïa ki tiar ba rit ba ria. Ka jingjyllei jong u drok, ka la pynlong ruh ïa ki kmie ki kpa, ki trai ïing ba kin don hapdeng ka jingsyier khamtam lei haba ki khun ki mih leit jingleit ne leit kai bad la ki paralok, bad ruh ban shu ieh kumto ïa ka ïing namar tang lait tiak, da wan phai, la lap ba ki la shah kyndang ha ki nongtuh. Ngi ïohi ruh ba watla la pynïeng ka kynroh kaba jrong, ka khyrdop kaba heh hynrei kum ki nongtuh i kumba kim salia ne don jingtieng satia hynrei ban kiew bad ïaid shakhmat ban tuh.
Na ki jingïoh kem bad kurup drok jong ki pulit, kata tang kiba tip, ngi la sngewthuh lypa katno ka jingjur ka jingwanrah drok sha kane ka jylla. Ngi dei ruh ban kynmaw ba kitei ki dei tang kiba la ïoh ban kurup. Sa katno pat u drok uba la lait sha ïew sha hat kiba ki pulit ki khlem ïoh satia ban kurup? Sngewshyrkhei wat tang ban pyrkhat ïa kata ruh namar ka long shisha ka jingeh ka bakhraw ba kum ka jylla ngi ïakynduh. Mynshwa, ki la don tang katto katne ki jaka ba la bna ba ki bun ki nongdie bad nongpyndonkam drok. Mynta, ka bih jong u drok ka la saphriang wat sha ki nongkyndong ruh. Ha sor lei, ka la jan sar lut sha man la ki shnong bad ki dong.
Ryngkat bad ki pulit, ki shnong ki thaw, ki skul, kolej, skulbah bad baroh ki nongshong shnong ki dei ban ïatreilang. Ym don tang kawei ne ar kynhun ka ban lah ban ïakhun ïa kane ka jingeh ka bakhraw kaba kum ka jaitbynriew bad ka jylla ka mad. Wat ap haduh ba u drok un bam duh syndon ïa ki khynnah bad ki samla jong ngi kiba dei ka lawei jong ka jylla. Lada ngam jylliew, u drok u wanrah ïa kiba bun ki jingeh bad jingma ïa baroh. Wat ap haduh ba yn da don ki nongpyndonkam drok ha ïing ha sem. Wat ong ba tang kiwei kin ngat, nga te ngan lait. Long kiba husiar ïa la ki jong bad wat pynslem ban shim jingïarap nangne nangtai. Ka patok ne byndi kam dei ka kut ka ban lah ban bthat ïa u kynjri jong ka jingshah teh mraw ha u drok. Ka patok ne byndi ka dei eh na ka bynta ki nongkhaïi drok kiba la riewspah da kaba pynsyrtok ïa kiwei.
Na ka bynta ki nongpyndonkam, ym ki nongkhaïi, ki donkam jingsumar met bad mynsiem. Ïatreilang na ka bynta ka lawei lym kumta ka jingjot ka la ap lypa ïa baroh – bad ïa kiba pyndonkam bad kumjuh ruh ïa ki bym pyndonkam drok. Ngi kyrmen ba da ka jingwan ki kynhun niam ha kane ka kynti, ngin sa lah ban nang ïoh shuh ka bor ban pynduh pyndam ïa ki drok kiba la pynjot lut ïa kiba bun. Na ka bynta kito kiba la shah teh mraw ha u drok, donkam ïa ka mon kaba skhem nalade ban lait na ka jingshah teh mraw bad ban long ki briew kiba la kylla.
