Shillong, Naitung 12
Ha ki khyndiat sngi ba la dep ka Hynñiewtrep Integrated Territorial Organisation (HITO ka la ujor sha ka Meghalaya State Pollution Control Board (MSPCB) haba ïadei ka jingpynkheiñ kyndon ka RNB Cement Umiam kaba la pynlong ïa ka Ophis ban jurip ïa ka jinglong jingman jong katei ka karkhana.
“Hadien ba ka Meghalaya State Pollution Control Board (MSPCB) ka la ïoh pdiang ïa ka jingujor na ka HITO, ka la phah ïa ka kynhun ki Ophisar ban leit jurip bad tohkit bniah ïa ka jaka treikam jong ka RNB Cement Umiam” ong ka kyrwoh khubor u Bah Donbok Dkhar President ka HITO.
Shuh-shuh la ong ba hadien ka jingjurip bad jingtohkit kaba bniah, ka MSPCB ka la lap ba ki jingkynnoh ba la ujor da ka HITO ki long kiba shisha. Ha ka jingtohkit ka pynpaw ba ka RNB Cement Umiam ka la pynkheiñ ïa ki kyndon bad ki aiñ kiba ïadei bad ka jingïada Mariang bad ka jingpynkhuid ïa ka sawdong sawkun, kumba la buh da ki bor ba dei peit.
Ka Meghalaya State Pollution Control Board ka la pynmih ka jingthoh kaba kdew ba la lap ïa ka jingpynkheiñ kyndon jong ka RNB Cement Umiam bad ka la bthah ruh ïa ka kompeni ban pyntreikam mardor ïa ki jingpynbeit ba katkum ki kyndon aiñ. Nalor kata la kdew ba ka Board kan treikam katkum ki kyndon aiñ.
Ha ka kyrwoh khubor ka HITO, ka ai ka jingïaroh ïa ka MSPCB ïa ka jingtrei shitom bad ka jingshimkhia ban tohkit ïa kane ka kam. Ka HITO ka kren skhem ba ka jingthmu ka dei ban ïada ïa ka Mariang, ban sumar ïa ka koit ka khiah jong ki paidbah bad ban pynthikna ba baroh ki karkhana kiba treikam hapoh Jylla Meghalaya kin bud ryntih ïa ki aiñ bad ki kyndon ïada Mariang kiba la buh da ki bor ba dei peit.
