Shillong, Naitung 12
Ka Khasi Jaiñtia Welfare Association (KJWA) ha ryngkat ka jingïatreilang bad ka Commissionerate of Food Safety, Sorkar Jylla, ka la pynlong ïa ka Awareness Programme halor ka jingkhuid bad jingshngaiñ jong ka jingbam (Food Safety), kaba la pynlong ha Mawlai Phudmuri, Shillong, halor ka phang “Na ka jingkitkhlieh sha ki lad ki lynti: Ka Jingbam kaba Shngaiñ ha kylleng sawdong “.
Ïa kane ka prokram la pdiang da ka Dorbar Shnong Mawlai Phudmuri bad la pynbeit ryngkat bad ka jingïatrei lang jong ka Seng Samla bad Seng Longkmie Mawlai Phudmuri.
Ïa ka jingïalang la pynïaid da u Dr. AW Rani, General Secretary jong ka Khasi Jaiñtia Welfare Association (KJWA).
Ka Kong D. B. S. Mukhim, Deputy Commissioner, Commissionerate of Food Safety, Sorkar Jylla ka la ai ka jingbatai kaba bniah bad kaba sngewtynnad shaphang ka jingkordor jong ka jingshngaiñ ha ka bam ka dih, ka jingkhuid bad ka jingtip paidbah kum ki nongthied.
Ka la ban jur halor ka jingdonkam ban bud ïa ki rukom pynkhreh bad sumar ïa ka bam kaba dei, ban pynneh ïa ka jingkhuid ha ki jaka die bad pynkhreh bam, ban sngewthuh ïa ki jingthoh ha ki marbam bad ban bud ryntih ïa ki kyndon jong ka jingshngaiñ ha ka bam ka dih.
Namarkata, ka la kyntu ruh ïa ki nongdie jingbam, ki nongsengkam lajong, ki nongthied, bad ïa ka Dorbar Shnong, ba kin ïatreilang bad ka ophis, khnang ban pynthikna, ba ka bam kaba poi sha man la ki longïing ka long kaba shngaiñ bad kaba tei met.
Ha kane ka prokram la wan ïashim bynta shitrhem da ki nongdie dukan, ki samla, ki nongsengkam lajong, ki dkhot jong ka Seng Samla, Seng Longkmie, bad kiwei pat ki nongshong shnong.
U Rangbah Shnong jong ka Mawlai Phudmuri, ryngkat bad kiwei pat ki nongkitkam jong ka Dorbar Shnong, ki la ïadonlang ha kane ka jingïalang, kaba pyni ïa ka jingangnud jong ki ban ïada ïa ka koit ka khiah jong ki paidbah lyngba ka jingpynsngewthuh paidbah.
Ka KJWA ka ai khublei kyrpang ïa ka tnad Commissionerate of Food Safety, Sorkar Jylla, khamtam ïa ka Kong DBS Mukhim, na ka bynta ka por bad ka bor jong ka.
Ka seng ka ai khublei ruh ïa ka Dorbar Shnong Mawlai Phudmuri, ka Seng Samla, ka Seng Longkmie, bad ïa baroh kiba la ïashim bynta ha kane ka prokram, namar ka jingïatreilang bad ka jingkyrshan jong ki, kaba la pynlong ïa kane ka Awareness Programme kaba jop bad ba seisoh.
