Shillong, Naitung 12
Ka Khun Hynniewtrep National Awakening Movement (KHNAM) ka la rai ban ym pynïeng kyrtong ha ka ilekshon MP shiteng samoi ka ban sa long da kaba kdew ba ka la khim palat ka por bad ka party ka dang donkam pynleit jingmut ha ka ban pynkhlaiñ ïa ka party.
U Working President ka KHNAM u Bah Thomas Passah haba kren sha ki nongthoh khubor u la ïathuh ba ka party ka la dep ban shong pyrkhat bha bad ka la shim ïa kane rai ban nym pynïeng kyrtong ha kane ka ilekshon shiteng samoi.
“Hooid, ngim lah ban len ba ngi donkam ban pynkhlaiñ shuwa ïa ka party, na kata ka daw na ka liang ka party ka la rai ban ym sei kyrtong” u la ong.
Haba jubab ïa ki jingkylli, u Bah Passah u la ong, “Haba ïadei ka MP ilekshon ngi hap ban peit ïa ki mat (Issue) kiba la sah kut ha Delhi, la ka dei ka Inner Line Permit (ILP), ka ktien Khasi, ban Amendment ïa ka ST Order 1950, lada ngi kyrshan ïano-ïano ngi hap ban pynthikna shuwa ïa ki mat kiba donkam bha ha ka Jylla” u la ong.
U la ban jur ba ka jingpynkylla (Amendment) ïa ka ST Order 1950 ka long kaba donkam bha bad la uta u kyrtong u don ne em kajuh ka jingsngew khnang ba kan long la jingsngewthuh lang bad ka jingmyntoi lang.
