Shillong, Naitung 12
Watla ka Sorkar Assam bad Meghalaya ki la wanrah ïa ka jingshongsuk shong shngaiñ hapdeng ki Karbi kiba sah ha Assam bad ki Khasi kiba sah ha Meghalaya ban ailad ïa ki briew na Lapangap ban leit rep hynrei ki Karbi ki la wan lur ïa u lum ban thung sohtrun. Haba ïakren bad u Bah Deimonmi Lyngdoh uba dei u Waheh Chnong ka Lapangap, West Jaiñtia Hills District u la ïathuh hadien ba la dep ïakren ban wanrah ïa ka jingshongsuk ha khappud, ki nongshong shnong Lapangap ruh ki la leit rep hynrei u Karbi u khlem khang ban rep pynban u lehmon namar ïa ki lum pynthor u la wanrah da ki traktor ban lur ïa ki lum kiba don syndah bad ki jaka rep kba.
U la pynpaw ba da ka jingwan lur ïa ki lum pynthor kan ktah ïa ki nongrep jong ki Lapangap kiba don sharum namar ynda la wan u slap ka khyndew kan sa tuid sha ki lyngkha.
“Baroh shi katta ngi rep ma ngi ïa u lum hynrei u Karbi u sdang leh jubor kumta na ka liang jong ngi, ngim kwah ban leit pynsangeh namar ka dang ïaid ka jingrep kba hynrei ngi la ai jingthoh sha u DC West Jaiñtia Hills halor kane,” u la ong.
Shuh shuh u la pyntip ba kine ki Karbi ki la thung da u symbai sohtrun ha kine ki lum ba ki la dep lur bad ki la pynpra ruh ïa ki ïingtrep ba la shna kiba na Lapangap.
U Bah Deimon u la kyntu ïa ka Sorkar Meghalaya ban pynhap beit ïa kine ki jaka rep sha Meghalaya namar ïa kine ki jaka la long trai da ki Lapangap da ki sawspah snem mynshwa.
Halor ka jingwan iuhkjat u Himanta Biswa Sarma, Myntri Rangbah ka Jylla Assam bad u Tuliram Ronghang u CEM ka KAAC ha Jowai, u khmih lynti ba kan wanrah ïa ka jingïajan bad ki nongsynshar ka Meghalaya.
Kumban shu pynkynmaw kane ka jingïohlad biang ki nongrep na Lapangap ban leit rep kba sha ki pynthor ka dei hadien ka jingïakynduh u Symbud Myntri Rangbah ka jylla u Bah Sniawbhalang Dhar bad u CEM ka Karbi Anglong Autonomous District Council u Tuliram Ronghong kaba dei ha ka 2 tarik Jylliew 2026 hadien ka jingïakynad kaba la neh la bun bnai.
