Dang shen na ka liang jong ka Federation of Khasi Jaiñtia and Garo People (FKJGP) bad ka Khasi Students’ Union, Upper Shillong Circle ki la buh jingkylli ïa ka Sorkar Jylla haba ïadei ka jingpynmih ïa ka ‘Ordinance’ ban pynlong ktien Sorkar lane ‘Official Language’ noh ïa ka ktien Khasi bad Garo nalor ka ktien phareng, da kaba pynpaw ba kane haduh mynta kam pat treikam haba ïa ki jingpynbna ne ki jingthoh dang pynmih beit ha ka ktien nongwei. Ngi lah ban kdew ba na ka liang jong ka Sorkar Jylla lyngba ka kynhun Myntri ka la ai jingmynjur ne jingithuh ïa ka ktien Khasi bad Garo ba kan long noh ka ktien Sorkar naduh ka 27 tarik u Ïaïong 2026. Ki nongïalam ka FKJGP bad KSU na Upper Shillong Circle ki la kynthoh ba ka Sorkar haduh kine ki sngi ka khlem pat pynmih ïa kino-kino ki jingpynbna paidbah ha ka ktien Khasi, hynrei ka dang ïai bteng ban pynmih ïa ki jingpynbna ha ka ktien nongwei bad kum ka dak ban ïaid shakhmat bad ka rai ne jingmynjur jong ka Kynhun Myntri, na ka liang kitei ki seng ki la aiti ruh ïa ka dorkhas kaba la thoh ha ka ktien Khasi sha u Director ka tnad Urban Affair u Prafulla Kumar Boro (MCS) u bym dei na ka jaidbynriew Khasi. Hato kata ka rai ban mynjur jong ka Kynhun Myntri ka Sorkar Jylla ka long tang ka rai ban pynbiej paidbah. Lada dei ba ka la pyntreikam shisha, la dei ban ai ïa ki jingpynbna ha ka ktien Khasi, Garo bad ka ktien Nongwei hynrei kumba ka long mynta, ngi lap ba kiba bun ki jingpynbna kiba wan na ka liang jong ka Sorkar ki long beit ha ka ktien Nongwei. Ngi lap ruh ba kiba bun ki jingthoh bad wat ki kyrwoh khubor ba pyllait da ki tnad bapher-bapher jong ka Sorkar sha ki lad pathai khubor, ki dang wan beit ha ka ktien Nongwei. Hato kane ka jingmynjur ban pynlong ktien Sorkar lane ‘Official Language’ ïa ka ktien Khasi bad Garo ka long tang ha ka jingïakren khlem pyntreikam pat ïa ka. Lada ka long ha kane ka rukom, ka paw ba ka lah ban dei tang ka jingkular pynbiej sha u paidbah khamtam lei ïa kito kiba sah ha ki thaiñ nongkyndong. Katkum ka jingmynjur jong ka Kynhun Myntri ban ithuh noh kum ka ktien Sorkar ïa ka ktien Khasi ka la wanrah jingkmen ha kiba bun khamtam ïa kito kiba kham duna ka jingnang jingtip hynrei imat ka jingshim rai ban mynjur ka la shu dei tang ban pynbiej paidbah khamtam lei ban ïohnong ha ki ilekshon. Ngi la sakhi na ka por sha ka por ka Khasi Authors’ Society (KAS) hapoh ka jingïalam jong u Dr. DRL Nonglait ryngkat ki dkhot ki la ïakhun na kawei ka por sha kawei pat ban pynrung noh ïa ka ktien Khasi hapoh ka Khyrnit kaba Phra bad kumjuh ruh ka jingïakhun ban pynbor ïa ka Sorkar ba ka dei ban ithuh noh ïa ka ktien Khasi kum ka ktien Sorkar. Hynrei kumba ka long mynta, la ïohi ba dei ka FKJGP bad KSU kiba la mih ban pynpaw ïa kane ka mat ba watla ka la ithuh ïa ka ktien Khasi kum ka ktien Sorkar hynrei kam pat shym la treikam satia. Kumta, lada dei ba ka dei kaba shisha, balei ka Sorkar kam shimkhia halor kane, balei ka KAS kaba la ïakhun tyngeh mynta pat ka sngap jar jar. Balei ym don jingpynshai halor kane ka bynta ba ka la treikam shisha ne em.
