Shillong, Naitung 13:
U Myntri Rangbah ka Jylla, u Conrad K. Sangma ha ka Lah Sngi U Blei u la pyntikna ban leh da kaba tyngeh pyrshah ïa kito kiba donkti ha ka jingjia ha Lapalang kaba la shim noh ïa ka jingim jong 5 ngut ki briew. Na ka liang jong u, u la ong ba ka Sorkar ka dang khmih bniah ïa ki lad ki lynti ban ai ka jingkyrshan sha ki longïing kiba la mad ïa katei ka jingjia ba sngewsih. Haba kren sha ki nongthoh khubor, u Conrad u la ong ba ki kyndon ki la don bad yn ym pdiang satia ïa ki jingpynkheiñ. “Yn pynshitom pyrshah ïa kito kiba leh ïa kane. Ki la don ki kyndon bad la khang ïa ki katto-katne ki bynta. Ki briew ki bym bud ïa kita, ki pynkheiñ ïa ka aiñ, bad yn pynshitom da kaba leh ïa kaba donkam pyrshah ïa ki,” la ong u Conrad. U la ong ba ki lanot ki wan na ki longïing kiba duna ka ïoh ka kot, bad ka Sorkar ka dang wad ki lad ki lynti na ka bynta ka jingïarap ha ka liang ka pisa-tyngka. “Ngi dang khmih bniah, ki don katto-katne ki jingdonkam namarba baroh ki dei na ki longïing kiba duna ka ïoh ka kot; kito kiba la khlad noh. Kumta, ngi dang wad ki lad ki lynti ha kaba ngi lah ban ai katto-katne ka jingkyrshan, kumta nga dang khmih bniah ïa kane,” u la ong. U Conrad u la bynrap ba u la ïoh pdiang ïa ki jingpynsngew na ki nongtrei jong ka seng kiba kyrpad ïa ki lad jingïarap na ka bynta kitei ki longïing. “Nga la ïoh shithi hynnin ka sngi na katto-katne ki dkhot ka NPP, ka Nongthymmai Unit…bad wat na kiwei ruh ki Unit na ki konstitwensi bapher-bapher. Kumta baroh ki Unit jong ka seng ha ki konstitwensi ki la thoh sha nga,” u la ong. U Myntri Rangbah u la kdew ba ki kyndon ka ‘Disaster Management’ kiba la don lypa kim kynthup ïa kum kine ki jingjia aksiden, hynrei u la pyntikna ba yn sa shim ïa ka rai da kaba pyrkhat ïa ka jinglongjingman jong ki lanot. “Ka jingeh ka long ba ha ka ‘Disaster Management’, kam don kano-kano ka kyndon ban kyrshan ïa ki jingjia aksiden kiba kum kane. Hynrei kumba nga la ong ba namarba ki dei na ki longïing kiba duna ka ïoh ka kot, ngan sa khmih bniah ïa kane ka kam bad ngan sa shim ïa ka rai,” la ong u Conrad. Kumban shu kdew hangne, 5 ngut ki briew ba kynthup 3 ngut ki nongbylla bad 2 ngut kiba leit ïarap ïa kitei ki 3 ngut ki la khlad na ka jingïoh ring mynsiem ïa ka tdem ‘Generator’ ha ka por ba ki dang tan um na kawei ka ‘Borewell’ kaba don ha Lapalang, Shillong.
