Shillong, Naitung 13:
Ki pulit ka Meghalaya ki la kem noh ïa ki hynriew ki briew ba kynthup lai ngut kiba la rangbah bad lai ngut kiba dang rit halor ka jingkynnoh ba ki la byrngem ïa ki nongtrei bad pynjot pynpra ïa ka ‘Oak’ home stay ha Risa Colony.
Halor kane ka jingjia, u Superintendent of Police ka East Khasi Hills Bah Vivek Syiem u la ong ba ka la don ka jingai jingujor ha ka 11 tarik mynta u bnai. “Ha kaba ïadei bad ka jingjia kaba la jia ha ka home stay kaba la ai kyrteng Oak kaba don ha Risa Colony, ngi la ïoh pdiang ïa ka jingujor ha ka 11 tarik mynta u bnai ba ki ar ngut ki briew ki la byrngem bad pynjot pynpra ïa kane ka jaka sah bad ki la mih noh na kane ka jaka, khlem da siew bai buria ne bai pynlut ksan,” la ong u Bah Vivek. U la ïathuh ba la register ar tylli ki case bad ka la don ka jingïatreilang bad ki pulit jong ka Assam. “Ban lap dien ïa kine ki briew, ngi la don ka jingïakren bad ki pulit Assam kata bad u SP Kokrajhar, SPAlipurduar bad ka kynhun na Sapatgram. Ha ka por kumba 4.45 janmiet, ngi la ïoh bat ïa kine ki briew kiba la tip kyrteng kum u Vikas Singh, Avinash Singh, Akand Pratap Singh bad lai ngut kiwei pat kiba dang khynnah bad don kumba 17 snem ka rta,” la ong u SP. Ïa kiba la kem la ïalam hakhmat ka ïingkashari ha Alipurduar bad kham hadien la pyllait noh lyngba ka jingai jamin. “Hadien ka jingïoh bat da ki pulit ka Alipurduar, ka kynhun jong ngi nangne ka la hiar sha katei ka jaka bad ban kem noh ïa ki bad ha kaba la leit rah hakhmat ka ïingkashari jong u CGM ha Alipurduar. Hynrei namar ba ki jingpynshitom ki dei kiba lah ban pynshitom tang hapoh ki hynñiew snem, ki la ïoh jamin noh. Ïa ki khynnah rit ruh la rah tian bishar hakhmat ka JJB,” ong u Bah Vivek. U SP u la ong ba la pynngat ïa kine ki briew hapoh ki kyndon ka BNS ba kynthup ïa ka kyndon 351(3), 324(3) bad 3(5) jong ka BNS Act. “Watla kila ïoh jamin, ngi la dep kem ïa ki. Ka jingtohkit kan dang ïaid ban pynthikna ba ngin charge-sheet ïa ki kham kloi kat kaba lah,” la bynrap u SP.
