Shillong, Naitung 14
Ka ïingbishar Meghalaya High Court kala bthah ïa ka Shillong Municipal Board (SMB) ba kan aiti ïa ki jingtip ba bniah halor ka jingshna bad jingsam ïa ki dukan na ka bynta ki nongshong dukan madan ha phyllaw ka Brightwell Bungalow.
Haba bishar ïa ka thup ki PIL ha ka sngi Nyngkong, ka ïingbishar ka Chief Justice Revati Mohite Dere bad Justice W Diengdoh, kala bthah ïa ka SMB ba kan file ïa ka affidavit ba pynpaw ba katno tylli ki dukan kin don, ha kaei ka jaka bad kaei ka por bala buh ban pyndep bad aiti sha ki nongshong dukan madan.
Ka ïingbishar kala bthah ruh ïa ka SMB ban pynshai la ka phyllaw ka Brightwell Bungalow ka dei ka jingtei kaba la rim, hadien ka jingpyrshah da ki katto katne ki nongmudui.
U nongïasaid aiñ ki katto katne ki nongmudui u la pyntip ïa ka ïingbishar ba ka jaka ka don ïa ka jaka kaba heh na ka bynta ki dukan bad ki jaka pynïeng kali bad kim don ruh ïa kano-kano ka jingpyrshah ban pynkynriah ïa ki nongshong dukan madan ha katei ka jaka.
La bthah ïa ka SMB ba kan file ïa ka affidavit hapoh ka Registry ryngkat ka jingai copy sha baroh ki kynhun liang mamla. Ïa kane ka mukotduma la buh ban bishar biang ha ka 29 tarik Naitung, 2026.
