Shillong, Naitung 14
U Myntri ka tnad ka koit ka khiah, u Bah Wailadmiki Shylla ha ka Sngi Ba-ar u la ong ba ka Sorkar Jylla kan sa phah ïa ka kynhun sha Delhi ha u bnai ban wan ban buddien halor ka kyrdan Institute of National Importance (INI) ïa ka North Eastern Indira Gandhi Regional Institute of Health & Medical Sciences (NEIGRIHMS).
U Bah Wailad u la ong ba u la pynsngew ïa kane ka mat ha u Myntri ka tnad ka koit ka khiah ka Sorkar Pdeng ha ka jingwan jngoh ba dang shen jong u sha Shillong na ka bynta ka jingïalang Parliamentary Committee halor ka koit ka khiah.
“U Myntri Sorkar Pdeng u la pyntikna ba kin sa buddien ïa kane ka kam na ka liang jong ki. Ki la bthah ruh ïa ngi ban aiti ïa ki kot ki sla kiba donkam,” la ong u Bah Wailad haba kren sha ki nongthoh khubor.
U la bynrap ba u la ïakren ruh bad u Myntri Rangbah ka Jylla, u Conrad K. Sangma halor kane ka kam.
“Ngi dang pynkhreh ïa ki kot ki sla. U Myntri Rangbah u la pyntikna ba ngin ïai bteng ban buddien ïa kane,” u la ong.
Shuh shuh u Myntri u la ong ba ka kynhun shen kan leit sha Delhi ha u bnai ban wan ban rah ïa ka jingdawa sha ka Sorkar Pdeng halor ka kyrdan INI na ka bynta ka NEIGRIHMS.
