Nongstoiñ, Naitung 14
Ka Hynñiewtrep Youth Council (HYC) Rambrai Circle hapoh ka jingïalam u samla Drowell Lyngdoh, President ha ryngkat ka jingdonlang u samla Lumlang Kharsyiemlieh President HYC West Khasi Hills District ha ka 14 tarik mynta u bnai kala ïoh ban ïakynduh ïa ka District Medical & Health Officer (DMHO) ka West Khasi Hills District halor ki mat jingduna ka PHC Rambrai.
Ki nongïalam ka HYC ki la ong ba ki mat ïa kaba ka seng kala ïoh ban ïakren ki kynthup halor ka jingbym don Ambulance ka PHC Rambrai mynta la lai snem bad ym tang kata ka jingbym don ‘pharmacies’ bad duna ki nongtrei.
Shuh shuh ki la ong ruh ba kane jingbym don Ambulance kala wanrah jingeh ïa ka thaiñ kaba la heh ha kaba wat ka C&RD Block ruh kala don hynrei haduh mynta tang ka Ambulance mynta la lai snem ym shym la don satia bad kane kala buh jingeh ïa ka thaiñ hi baroh kawei.
Ki la ong ruh ba sa kawei pat, lada ym don nongaidawai ha katei ka PHC, ka la buh jingeh ïa ka thaiñ, kumjuh ruh ka jingduna ki nos bad kiwei kiwei.
Ki nongïalam ka HYC ki la ong ruh ba ka seng ka kyntu ïa u RG Momin, MLA ka Rambrai ban shimkhia ïa kine ki jingduna ha katei ka PHC, namar kala long ka jinglehrain ïa ka thaiñ kaba shah iehnoh beiñ bad ki la pynpaw ba ka HYC ka ngeit skhem ba u MLA un shimkhia ïa kane ka bynta.
Shuh shuh ki la ïathuh ruh ba ha ka jingleit ban ïakynduh, na ka liang ka DMHO ka la ong, ba kala dep pan ne thoh bunsien hynrei kam pat urlong haduh mynta, hynrei ka pynpaw ba na ka liang jong ka, kan nang ïai buddien bad kyrmen kan sa urlong.
