Shillong, Naitung 14
Lai ngut ki nongtuh ïa ki arshaka ki la shah kem noh ha ki pulit bad na ki la ïoh ban kurup ar tylli ki arshaka kiba ki la tuh na kiwei pat.
Katkum ka khubor na ki pulit la ong ba ki pulit ka thanad Tikirikilla ha ka miet jong ka 11 tarik mynta u bnai, ki la pynlong ïa ka jingtalasi ha kaba ki la ïoh ban bat ïa ar ngut ki suba nongtuh arshaka kiba ki la i suba sniew katba ki dang wan da kawei ka arshaka Bajaj Platina ka bym don ïa u registration number.
Kine ki ar ngut ki kynthup ïa u Minith Marak na ka shnong Teksagre kaba hap hapoh ka thanad Damal Asim ha WGH bad u Jaksram G Momin na Raksamgre kaba hap hapoh ka thanad Tikirikilla.
Ïa kine baroh arngut la rah noh sha thanad Tikirikilla ban pynlong shuh ka jingtohkit bniah. Ha ka por jong ka jingtohkit, ki pulit ki la lap sa kawei ka arshaka Bajaj Pulsar kaba don ïa u registration number AS21-M-7462 na kine ki ar ngut.
Shuh shuh haba la tohkit bniah, kine ki ar ngut ki la phla ba ki la tuh ïa kane ka arshaka Bajaj Pulsar na ki thaiñ Dadenggre. Ha kaba ïadei bad kane, la dep ban register case ha thanad Dadenggre bad ïa kine ki ar ngut la aiti noh sha ki pulit jong ka Dadenggre ban tohkit kham bniah bad leh ïa kaba donkam katkum ka aiñ.
Ha ka por ba la pynïaid shakhmat ïa ka jingtohkit ba bniah, ki pulit ka Dadenggre ki la pynlong shuh shuh ka jingbuddien bad ha kaba ki la ïoh ban kem sa uwei pat uba donkti lang bad ki ha ka kam tuh uba tip kyrteng u Baiti A Sangma na Tebronggre kaba hap ha thanad Damal Asim.
Na ka liang jong ki pulit ha ka 14 tarik Naitung, 2026 ki la ïoh ban kurup sa kawei ka arshaka na Rongmasugre kaba hap hapoh ka thanad Damal Asim.
