Mawkyrwat, Naitung 14
Kawei ka longkmie kaba la tip kyrteng kum ka Kong Snity Wahlang ba la 56 snem ka la khlad noh hadien ba ka la shah dung da ka tari ha u Bailing Wahlang ba la 62 snem uba dei u hynmen trai jong ka, kaba la jia ha Mawkhan, Pynden-umsaw ha South West Khasi Hills District.
Katkum ka tyllong khubor kaba la ïoh na ki pulit la ïathuh ba katei ka jingjia ka la jia ha ka step jong ka 14 tarik u Naitung, 2026 ha ka por kumba 6:40 eiei bad ïa ka Kong Snity Wahlang kaba la mynsaw jur la lap da ki paidbah shnong ha kaba mar mar ki la pynkit noh ïa ka sha Civil Hospital Mawkyr-wat, hynrei ynda la poi ha ka jaka ai jingsumar, u doktor u la pynbna ba ka la dep ban khlad lypa.
Ka Kong Snity Wahlang ka don hynriew ngut ki khun kata saw ngut ki khun kynthei bad arngut ki khun shynrang bad katkum ka jingïoh jingtip na ki paidbah shnong la ïathuh ba u Bailing Wahlang u la dung da ka tari ïa la ka jong ka para namar ki don kiba ïohi ha ka por ba u khylliap ïa ka tari hynrei ym shym la tip na kaei ka daw ba u la leh ïa kane ka kam.
Shuh shuh la ïathuh ruh ba u Bailing Wahlang hadien ba u la leh ïa kane ka kam runar ïa la ka para u la phet noh bad haduh mynta ki pulit ki dang thwet ban ïoh kem ïa u.
Ha kaba ïadei bad katei ka jingjia, u Secretary Shnong Pyndenumsaw u la ujor da ka ejahar bad hadien la register ïa ka case hapoh ka Mawkyrwat Women PS Case No. 12/2026 hapoh ka Section 103(1) jong ka Bharatiya Nyaya Sanhita (BNS).
