Shillong, Naitung 14
U Myntri ka tnad ka koit ka khiah jong ka Sorkar Jylla Bah Wailadmiki Shylla u la ong ba ka jingpang Tuberculosis (TB) ha ka Jylla ka pyni ïa ka jinghiar, hynrei u la ban jur pat ïa ka jingdonkam ban don ka jingkyrshan ba kin ïoh ïa ki jingbam kiba tei ban ai bor ïa ki.
Haba pyntip ïa ka kaiphod kaba thymmai, u Bah Wailadmiki Shylla u la ong ba ka jinghiar kam long kaba ïaryngkat namar ka ïapher na kawei ka jaka, kumta donkam ban kham pynleit jingmut.
U la pynpaw ïa ka jingsangeh ki nongpang ban bteng ïa ka jingsumar ka dei kawei ka jingeh kaba kongsan, kumta u la kyntu ïa ki paidbah ba kin ai ka jingkyrshan ïa ki nongpang.
“Ngi kyntu ïa ki paidbah ban wan shakhmat ban shim ïa kine ki nongpang kum ki khun lajong namar ki don ki khep ba ki khlem buddien ban dih dawai ha ka por ba la buh,” u la ong.
Haba kdew ïa ka jingdonkam jong ka jingbam ha ka por ba ai jingsumar, u Bah Wailadmiki u la ïathuh ba u la thoh shithi sha baroh ki MLA ba kin shim kum ki khun ïa ki nongpang TB ha ki konstitwensi jong ki bad ban ïarap ïa ki da ka jingïarap pisa na ka bynta ban thied ka bam kaba tei met khamtam ha ki jaka nongkyndong kiba duk.
“Ha ka por ba ki dih dawai, ki donkam ïa ki jingbam kiba tei met. Dei na kata ka daw ba nga la kyrpad ïa ki MLA ban ai jingkyrshan ban thied ïa ki jingbam kiba tei met,” u la ong.
U la pynpaw ka jingshaniah ba kum kine ki sienjam kin nang pynhiar shuh shuh ïa ki nongpang TB.
U Myntri u la bynrap ba 2-3 tylli ki District ki dang sah kum ki jaka ba don jingma hynrei um shym la jer kyrteng satia.
