Shillong, Naitung 14
U Myntri Sorkar, u Bah Wailadmiki Shylla ha ka Sngi Ba-ar u la ong ba ka Sorkar Jylla ka don ka jingkyrmen skhem ban wad ïa ka lad ka lynti ban ïaid shakhmat haba ïadei bad ka jingtih par kaba rit hadien jong ka jingïakren kaba “man-bha” bad ka Sorkar Pdeng.
U Bah Wailad u la ong ba da ka jingstad tenoliji ba mynta, ka jingtih par katkum ka juk stad saian (mynta) ka lah ban urlong shisha.
Ha kajuh ka por, u la ai khublei ïa u Myntri Rangbah ka Jylla, u Conrad K. Sangma uba la pynpaw ïa ki jingeh jong ki nongtih par ka Ri-lum Jaiñtia.
U Myntri u la pyn-kynmaw ruh ba katba ka Sorkar NPP ka la jop ban weng noh ïa ka jingkhang jong ka NGT, hynrei yn ïai khang pat ïa ka jingtih ‘liew khnai.
U la ong ruh ba ka Jylla naduh kata ka por ka la ïarap ïa ki nongtih par ban ïoh ïa ki ‘Mining Plan’ bad ban sdang ïa ka jingtih par katkum ka juk stad saian.
Hynrei u Bah Wailad u la kdew ba kiba bun ki par ha kane ka thaiñ ki dei kiba rit, ha kawei ka liang kaba buh jingeh pat ban bud ïa ki kyndon ba mynta. Kane ka la ïalam sha ki jingïakhih kiba jur ha u bnai ba la dep ban dawa mynjur na ka bynta ka jingtih par kaba rit.
U la ong ba la ïaid ruh shakhmat bad ka jingwad bniah lem bad ka jingbatai shai hashuwa ba u Myntri Rangbah un leit sha Delhi.
“Ka jingïalang ka long kaba manbha shibun, bad u Myntri Sorkar Pdeng u la sngewtynnad ïa katei ka jingmut. Kin sa wad bniah halor kane,” la ong u Bah Wailad.
“Kumba ka long mynta, ka jingpynïaid kam ka la ïaid beit ïaid ryntih. Kyrmen ba ngin sa lah ban wanrah ïa ka lad na ka bynta ka jingtih par kaba rit,” u la bynrap.
