Shillong, Naitung 14
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Samborlang Diengdoh u la ai ka jingujor ba hapdeng ka 7 bad 10 tarik mynta u bnai, ki runar bym lah ban ithuh, ki la tuh ïa ki kor CCTV bad ki waiar na ka thaiñ Urkaliar, Shillong.
Katba na ka liang jong u Edwanlang Riwah u la ai ka jingujor ba ha ka 6 tarik mynta u bnai ha ka por kumba 10.30 mynmiet, ki runar bym lah ban ithuh, ki la tuh ïa ka mobile phone jong u na ka kali jong u (ML05-U-3080), kaba la pynïeng ha Police Bazar, Shillong.
Ha kawei pat ka khubor, kawei ka longkmie ka la ai ka jingujor ba ha ka 12 tarik mynta u bnai, u para jong ka u la tuh ïa ka tyndong lyer shet jingshet (LPG cylinder) na ka jaka sah ka jong ka, kaba hap hapoh ka thanad Rynjah, Shillong.
Ha ka 13 tarik mynta u bnai, ki pulit ki la ïoh jingtip ba ki runar bym lah ban ithuh, ki la prong tuh hapoh ka ophis jong ka Meghalaya Defence Civilian Workers Credit Co-operative Society kaba don hajan jong ka jingkieng Umshyrpi, Shillong bad ban tuh kawei ka DVR bad ka pisa T.200/-.
Ha kawei pat ka khubor, ka PG Momin ka la ai ka jingujor ba ha ka step jong ka 13 tarik mynta u bnai, la lap ba ki lai tylli ki masi ki la jah napoh ka sem masi jong ka kaba don ha ka shnong Phlangkaruh (EKH). Ka nongujor ka la suba jur ba ïa kine ki masi la tuh da ki nong Bangladesh.
Katba na ka liang jong u Grace Starwell Marngar u la ai ka jingujor ba ha ka miet jong ka 7 tarik mynta u bnai, ki runar bym lah ban ithuh, ki la prong tuh hapoh ka ophis jong ka Langtor Higher Secondary School (EWKH).
Kumjuh ruh na ka liang jong u Polen D Sangma jong ka shnong Samanda Dolwarigre (EGH) u la ai ka jingujor ba ha ka 10 tarik mynta u bnai ha ka por kumba 2 baje dang step, ki runar bym lah ban ithuh ki la tuh ïa ar tylli ki masi.
Na ka liang jong u Tribath N Sangma u la ai ka jingujor ba ha ka 11 tarik mynta u bnai ha ka por kumba 1.30 mynsngi, ki runar bym lah ban ithuh, ki la tuh ïa ka arshaka jong u kaba dang thymmai na ka jaka najan jong ka FCI Godown ha Williamnagar (EGH).
Kumjuh ruh u Om Basfor u la ai ka jingujor ba ha ka step jong ka 13 tarik mynta u bnai, u la lap ba ka arshaka jong u, kaba don ïa u registration number ML08-H-1891 ka la jah na ka jaka pynïeng ha Mondoltilla, Tura (WGH).
Ha kawei pat ka khubor, ha ka 10 tarik mynta u bnai ha ka por kumba 2.50 mynsngi, u Joshi Kit R Marak (27 snem), u la ai jingujor da ka ktien ba ki runar bym lah ban ithuh, ki la tuh haduh kumba 30 ne 35 kilo u waiar copper aluminium na ka storeroom kaba don ha Kosichora kaba hap hapoh ka thanad Bajengdoba (NGH).
