Shillong, Naitung 14
U Chief Electoral Officer (CEO), Dr. B.D.R. Tiwari ha ka Sngi Ba-ar u la ong ba ka Jylla ka la kynjoh haduh 84.77% haba phai sha ka jingsam ïa ki ‘Enumeration Form’ hapoh jong ka Special Intensive Revision (SIR), 2026.
U la ong ruh ba la sam 19,91,883 tylli ki phom na ki 23,49,645 ngut ki nongthep ‘vote’ haduh ka por 9:58 baje mynstep jong ka 14 tarik Naitung.
Na kine, ki ‘Enumeration Form’ kiba la pynrung lyngba ki lad ‘digital’ haduh mynta ki don 5,64,610 tylli – kaba kot sha ka 24.03% na baroh ki nongthep ‘vote’, ong u Dr. Tiwari haba kren halor ka SIR, 2026.
Katkum ka jingong u CEO, ka West Jaiñtia Hills ka la sakhi ïa ka jingsam kaba bun eh, kaba long 98.94%, bud sa ka South West Garo Hills – 97.77%, North Garo Hills – 95.12%, South West Khasi Hills – 90.37%, bad ka East Garo Hills – 88.84%.
Haba phai sha ki lad pynïasoh ‘digital’, ka East Jaiñtia Hills ka lamkhmat da 41.55%, bud sa ka South West Khasi Hills – 40.31%, Eastern West Khasi Hills – 36.73%, South West Garo Hills – 34.01%, bad ka West Garo Hills – 33.23%.
Kum shi bynta ban kyntiew ïa ka jingpynsngewthuh paidbah, u Dr. Tiwari u la pynlong ïa ka ‘Awareness and Interaction Programme’ bad ki dkhot ka Ïingdorbar Thawaiñ ka Jylla ha ka ‘Hybrid Mode’ ha Conference Hall jong ka MLA Hostel, Shillong ha ka 13 tarik Naitung.
Ha kajuh ka por, u la batai ïa ki jingthmu, ki jingbuh por bad ki rukom treikam jong ka SIR, 2026 bad pan jingkyrshan na ki MLA ban pynshlur ïa ki nongshong shnong kiba dei hok ban ïashim bynta.
U CEO u la ong ba man ka taïew, la ju pynlong ïa ki ‘Video Conference’ bad ki District Election Officer (DEO), Electoral Registration Officer (ERO) bad ki Assistant Electoral Registration Officer (AERO) ban khmih bniah ïa ka jingïaid shaphrang jong ki kam ba ïadei bad ka jingsam sha man la ki thliew ïing, ki lad pynïasoh ‘digital’ bad kiwei-kiwei ki kam halor ka SIR.
La bthah ruh ïa ki ophisar ban buddien bha ïa ki Booth Level Officer (BLO) bad ban pynbeit ïa ki jingeh ba ïakynduh kumjuh ban pyntikna ba ïa kane ka kam la pyndep hapoh ka por ba la buh da ka Election Commission of India (ECI).
Na ka liang u Dr. Tiwari, u la ïaroh ïa ka jingtrei shitom jong ki DEO, ERO, AERO, BLO, BLO Supervisor bad kiwei-kiwei ki ophisar ka tnad ilekshon haba ïadei bad ka bynta jong ki ban pynïaid shakhmat ïa kane ka kam.
Shuh shuh u CEO u la kyrpad ïa ki nongthep ‘vote’ ki bym pat ïoh ne pynpoi ïa ki ‘Enumeration Form’ jong ki ba kin ai ka jingïatreilang bad ki BLO ha ka por ba ki leit sha man ki thliew ïing bad ban kynjoh sha ki na ka bynta ki jingïarap.
“Ka ophis jong u CEO ka kyrpad biang sa shisien ïa baroh ki nongthep ‘vote’ kiba dei hok ban ïashim bynta shitrhem ha ka ‘Special Intensive Revision’, 2026 bad ban pyntikna ba uwei-pa-uwei u nongshong shnong uba dei hok un shah kynthup ha ka thup kyrteng jong ki nongthep ‘vote’,” ong ka kyrwoh.
