Shillong, Naitung 14
U Samla Reuben Najiar, General Secretary ka Khasi Students’ Union (KSU) u la ong ba naduh u snem 2016 ka don ka jingmynjur ban pyntreikam ïa ka MRSSA 2016, hynrei khlem da pyntreikam ïa ka aiñ, ka Sorkar ka la wanrah pynban ïa ka amendment ha u snem 2019.
Haba kren sha ki lad pathai khubor u Samla Reuben u la ong ba ka jingïakren haba ïadei bad ki aiñ ban ïada na ka jingwan rung kyrthep ki mynder sha kane ka Jylla, kadei namar ka jingpyrshah ka seng ïa ka Food Court ha ka jaka kaba la thmu ban shna ïa ka Felicitation Centre.
“Ka seng ka suba ba ka Sorkar kam treh ban wanrah ïa ka MRSSA-2016, hynrei ban amend ïa ka 2019 namar ba ka kwah ban wanrah ka jingpynkulmar jingmut ha u paidbah,” u la ong.
Nalor kata, u la ong ruh ba dang ha kine ki khyndiat sngi, u Myntri Rangbah ka Jylla, u ong ba kam eh ban thaw ïa ki khyrdop talasi, hynrei kaba jynjar kadei namar ka jingbym don ki aiñ, ha kaba na ka liang u Samla Reuben u la ong, ba ka don ka MRSSA-2016.
“Ka Sorkar Jylla kam dei satia ban pynshad shrieh da kumne kumtai, hynrei kadei ban pyntreikam noh ïa ka MRSSA kumba ka long. Ka MRSSA ka la mih naduh u snem 2016 hynrei ban pyntreikam ruh kim pat sdang haduh mynta,” la ong u Samla Najiar.
U la kynthoh ruh ba ka jingwanrah ka Sorkar ïa ka amendment ha u snem 2019, kadei namar ba kim pat kwah ban pyntreikam ïa ka MRSSA-2016.
“Ka MRSSA kan nym lah ban bujli ïa ka Inner Line Permit (ILP), katba ka jingdawa ban ïoh ïa ka ILP ha ka Jylla ka dangïaid, ka Sorkar kadei ban pyntreikam shuwa ïa ka MRSSA. Ha ka MRSSA, yn nym lah ban khang ïa ki briew ban wan sha kane ka Jylla, hynrei ka don pat ka jinglum jingthoh ba mano ba rung bad mano ba mih, bad kane ka lah ruh ban ïoh bat ïa ka jingrung u drok ha ka Jylla” la bynrap u Samla Reuben. Kumta ka jingdawa mynta ka long ba ka Sorkar kadei ban pyntreikam noh ïa ki khyrdop mih bad khyrdop rung bad ban sdang pyntreikam pura noh ïa ka MRSSA.
“Ngim tip ba balei ka Sorkar kam kwah ban pyntreikam ïa kane ka MRSSA-2016, haba dei ma ki hi kiba wanrah ïa kane ka aiñ bad ma ki hi kiba shna ïa ki kyndon. Balei ka Sorkar ka wanrah sa ïakata ka amendment 2019, kane kam don eiei, bad ka Sorkar kadei ban pyntreikam beit mardor ïa kane ka MRSSA-2016,” la bynrap u Samla Reuben.
U la ong ruh ba ka jingdawa ïa ka ILP ruh ym pat ïoh, ka MRSSA-2016 ruh ym shym la pat pyntreikam, te kumno pat yn lah ban peit bad talasi ïa ka jingrung kyrthep ki briew ba nabar sha ka Jylla jong ngi.
Kumta u la ong ba ka KSU hi ka dawa ba ka Sorkar kadei ban pyntreikam noh ïa ka MRSSA-2016 khnang ban lah ban tehlakam ïa ka jingrung kyrthep ki briew ba nabar sha ka Jylla Meghalaya.
