Shillong, Naitung 15
U nongïalam jong ki Khasi kiba sah ha Bangladesh u Bah Andrew Sohlamar u la pynpaw ba ka jingpyllait ka India ban leh Visa ïa ki nong Bangladesh ban wan sha India ka la pyni ka jingsdang ka jingïajan hapdeng kine ki ar tylli ki ri.
U la ïathuh ba ka India ka la khang ïa ka Visa ïa ki nong Bangladesh naduh ba ka Sorkar jong ka Sheik Hasina ka la khyllem noh ka bor synshar ha u bnai Nailar, 2024.
U la ïathuh ba ka Bangladesh ka pyllait beit ïa ka Visa ïa ki nong India ban leit sha Bangladesh tangba ki nong Bangladesh pat kim ïoh ban leit sha India.
“Kane ka Visa ba khang ka India ka dei tang ïa kiba wan ha ka kyrteng kum ki nongjngohkai pyrthei bad ïa ki riew tymmen, katba ïa kiba long kyrkieh kum ha ka pang ka shitom bad kiwei de ka India ka shah,” u la ong.
U Bah Andrew u la ïathuh ba watla ka India ka la shah ban leh Visa ïa ki nong Bangladesh ban wan sha India hynrei ka dang pyrkhing pat namar ki don ki seng saiñpyrthei kiba don jingïadei bad ka Pakistan dei na kane ka daw ba ka India ka hap ban pyrkhing.
Shuh shuh u la pyntip ba naduh ba la khang ki khappud, ka ïoh ka kot ka la hiar baroh ar tylli ki ri namar u mawshun, dewïong, ki haat khappud ki dang shah khang.
U la pyntip biang ba kiba bun bah kiba treikam ha khappud ha West Bengal ki la long kiba khlem kam naduh ba la khang ïa ka jingïadei hapdeng ka India bad Bangladesh.
U don jingkyrmen haba kane ka Sorkar thymmai ba la ïalam da ka BNP kan dang ïatreilang bad ka Sorkar India khnang ba ki paidbah kin ïoh jingmyntoi.
Watla ka Sorkar BNP ka la synshar ïa ka Bangladesh naduh u bnai Rymphang 2026 hynrei haba mynta ka la ïaid kumba 5 bnai ka dang shimpor ïa kane ka Sorkar bad ka Sorkar India ban plie biang ïa ki haat khappud kaba don bad ka Meghalaya.
Ka border haat ka dei ka ïew khappud jong ki duk ki rangli kiba ïadie ïathied mar kylliang ïa ki mar ki mata ba pynmih na ki paidbah jong kitei ki ri.
