Mawkyrwat, Naitung 15
Ki pulit ka Women PS ki la ïoh ban kem noh ïa u Bailing Wahlang, 62 snem uba la phet rieh hadien ba u la shah kynnoh ba u donkti ban dung ïap ïa la ka jong ka para ka Kong Snity Wahlang, 56 snem ha ka shnong Mawkhan, Pyndenumsaw, South West Khasi Hills District.
Katkum ki tyllong khubor na u Bah B Jyrwa, Superintendent of Police ka district la ïathuh ba ïa u Bailing Wahlang la ïoh ban bat da ki paidbah shnong Rohbah ha ka step jong ka 15 tarik Naitung, 2026 bad mar ïa ïoh jingtip ki pulit ki leit ban kem noh ïa u.
Ha ka jingtohkit, utei u rangbah u la phla ba ula leh ïa katei ka kam ban pynïap dusmon ïa la ka jong ka para bad ki pulit ki la kurup noh ïa ki jaiñ phong jong u ban leh ïa ka ‘blood sample’ katkum ki kyndon jong ka aiñ.
Shuh shuh haba bteng ban tohkit bniah, u Bailing Wahlang u la mynjur ba u kloi ban ïalam mon sngewbha ïa ka kynhun pulit sha ka jaka ba la buhrieh ïa ka tiar ba u pyndonkam bad ki pulit ki la kyrpad ruh ïa ka ïingkashari ban ailad ban set ïa u shisngi hapoh ka along ki pulit, namar ki donkam ban leit ïalam ïa u sha ka jaka ba u pynïap bad ban pyni kumno u leh ïa katei ka kam runar bad ban lap shuh shuh ïa ka daw kaba la pynlong ïa u ban leh ïa kane ka kam runar.
Kum ban shu pynkynmaw ba u Bailing Wahlang ha ka step jong ka 14 tarik u Naitung, 2026 la kynnoh ba u la dung ïap da ka tari ïa la ka jong ka para ka Kong Snity Wahlang kaba don hynriew ngut ki khun na ka shnong Pyndenumsaw, South West Khasi Hills District.
Ïa ka Kong Snity Wahlang kaba la mynsaw jur la lap ïa ka da ki paidbah shnong ha kaba mar mar ki la pynkit noh sha Civil Hospital Mawkyrwat hynrei kaba sngewsih ynda poi ha ka jaka sumar u doktor u la pynbna ba ka la dep khlad lypa.
La ïathuh ruh ba utei u rangbah hadien ba u la leh ïa katei ka kam runar ïa la ka para u la phet rieh noh bad dei haduh ka step kaba bud ba la ïoh ban bat ïa u da ki paidbah ka shnong Rohbah, South West Khasi Hills District.
