Nongpoh, Naitung 15
Ha kawei ka jingjia kaba la jia ha ka sngi Balang, lai ngut ki heprit kila duh ei noh ïa la ka jong ka jingim hadien ka jingshah bat bording ilektrik ha ka shnong Umtangling kaba hap ha ki thaiñ Umroi, Ri Bhoi District.
Katkum ka khubor ba la ïoh lum, la ïathuh ba kane kala jia ha ka por kumba 2 baje eiei ha katei ka shnong Umtangling katba kitei ki heprit ki dang ïaid lynti, kala don ka jingdkut ki sainar ilektrik jong ka 11 KV ha kaba kitei ki heprit kila kum tyngkhuh kat haduh ba kin da duh syndon ïa la ka jingim ba kordor. Na ka liang u Rangbah Shnong ka Umtangling, u Bah Bok Nongbsap, u la ïathuh ba katei ka jingjia ka dei kaba ym lah satia ban poi pyrkhat bad pyntip ruh ba kitei ki lai ngut ki heprit ki don hapdeng ka jingbymtip ïa ka jinghap bad dkut utei u sainar ilektrik.
U Bah Bok Nongbsap u la ïathuh ruh ba ar ngut na kitei kiba khlad ki dei ki shipara kiba dang don hapdeng ka rta ba 11 bad 12 snem ka rta.
Utei u nongïalam u la pynpaw ruh ïa ka jingsngewkhia jur ba hashwa kane ka jingjia ba sngewsih, na ka liang ka shnong hapoh ka jingïalam ka jong u, ka la dep ban ujor sha ka tnad MeECL naba kala don ka jingsniew jong u Transformer bad ki sainar kiba la jan dkut, hynrei kaba kham sngewsih shuh shuh ka long ba ka MeECL kam shym la leh eiei bad shimkhia ïa katei ka jingujor.
