Shillong, Naitung 15
Ki paidbah kiba leit kiba wan ha Khyndailad ki la syier mynsiem namar ki suba ba don kiba wan buh bom hadien ka jinglap ïa ka jingdon ka pla bad ka troli ba la buh ha jaka ïeng kali ha OB Mall.
Kane ka jingsyier ki paidbah ka la pynsahkut kali palat shi kynta namar ki pulit kim shah shuh ban ïaid kali namar ki sheptieng ïoh don ka jingjia ba mynsaw.
Kane ka jingjia lap pla ka dei ha ka por kumba 11:30 mynstep haba ki briew ki la ïohi ïa ki tiar kiba la sahkut khlem nongpeit.
Ki khubor ki la saphriang stet bad ki nongthied ha ka jaka khaïi kaba bun briew ki la sngewtieng.
Kumta ki pulit ki la hiar mar mar sha katei ka jaka, ki la khang khyrdep ïa katei ka jaka ïeng kali bad ki la khang lut ïa baroh ki kali kiba wan na IGP sha Khyndailad.
Kane ka jingsyier ka la wanrah ïa ka jingdheng kali kaba jur ha kylleng ka sor ha ki por ba ki paidbah ki dang bunkam ka leit ka wan.
Kumta ki pulit ki la phah wan da ki stad peit bniah ïa u bom hynrei ha ka por 12:30 mynsngi shwa ba ki ‘bomb squad’ kin wan poi, la wan mih u briew uba dei trai ïa ki tiar.
Ki pulit ki la ïathuh ba utei u briew u la buh ïa katei ka troli bad ka pla ha ka por ba u leit donkam sha ka MUDA complex na ka bynta ka kam jong u bad u la klet ban shim pat ïa ki.
Hadien ba la pynshisha ïa ka jinglong trai bad shim jingkren jong u, ki ophisar ki la pynkhuid ïa katei ka jaka bad plie biang ïa ka surok ban ïaid kali.
Ki paidbah kiba la ïa lum da ka jingkhuslai, ki la ïoh pynhiar mynsiem haba u trai u la wan ban kam ïa ki tiar.
Ki pulit ki la kyrpad ïa ki paidbah ba ki dei ban pyntip mardor ïa ki tiar ki tar ki bym don ba peit bad ban kiar na kaba ieh ïa ki tiar ha ki jaka paidbah.
