Shillong, Naitung 15
Ka Shillong ka la pynkhreh na ka bynta ban ïoh ïa ki surok kiba tbeh jingshai bad ka suiñbneng kaba khuid katba ka tnad kam pynroi sor ka dang ïaid shakhmat ban pynbeit ïa ka saiñdur bathymmai ban khmih ïa ki jingtbeh jingshai bording (street light) ha surok bad ban weng ïa ki waïar kiba sdien rynjup ha ki ‘post’ dieng ilektrik.
U Symbud Myntri Rangbah ka Jylla ka tnad kam pynroi sor, u Bah Sniawbhalang Dhar ha ka Sngi Balang u la ong ba ka Sorkar ka la ïa pynbeit kano ka tnad (agency) kan peit ïa kaei, ban pynkut noh ïa ka jingkulmar jingmut haba ïadei bad ka jingmaramot bad jingpynbha.
“Ngi dang don ha ka kam. Nangne shakhmat, ïa ki jingtbeh jingshai bording surok ha ki katto-katne ki jaka yn sa khmih da ka Municipal Board. Ka tnad bording bad ka ‘Smart City’ kin peit ruh ïa ki jingtyrwa bad ki kam maramot ha kiwei pat ki jaka,” ong u Bah Dhar.
Ka Detailed Project Report (DPR) na ka bynta ka projek jingshai bording ka la dep. Ka tnad mynta ka dang pynlong ïa ki jingïalang bad ki Rangbah Shnong ban pynithuh ïa ki jaka ba kongsan na ka bynta ka kylla banyngkong.
“La jan baroh ki jaka kiba kongsan yn kynthup ha ka kylla ka banyngkong. Ka Municipal Board kan shimkhia ïa ka jingmaramot hangta. Katto-katne ki jaka kin sah bad ka tnad bording,” u la ong.
U Bah Dhar u la ong ruh ba ka jingthmu ka long ban pynbeit ïa la ki jong ki jong ki jingkitkhlieh.
“Ngi la poi sha ka jingkut jingmut, kumta kam don shuh ka jingkulmar jingmut. Ngin sa batai bniah ïa ki jaka bad kano ka tnad – Municipal ne tnad bording – kan peit ïa ki,” u la ong.
U Symbud Myntri u la kren ruh shaphang ka jingthmu jong ka Jylla ban pynkhuid ïa ki waïar kiba sdien halor kiba don ha kylleng ka Shillong.
“Ïa kane la sdang da ka tnad kam pynroi sor. U Myntri Rangbah ka Jylla u la dep ban jurip ïa ki jaka bad u la dep ruh ban pynbna. Ngin thmu ïa baroh ki jaka ba heh kiba don ki waïar kiba sdien rynjup bad ban pynkynriah ïa ki ha ka rukom kaba dei. Ka thong ka long ban pynlong ïa ka sor kaba khuid ba suba,” ong u Bah Dhar.
