Shillong, Naitung 16
Ki nongpynïaid bad nongtrei ka W. F Passah Pvt. Ltd ha ka 16 tarik u Naitung 2026, ki la mih shakhmat ban pynshai paidbah halor ka jingkynnoh u wei u briew, ïa uba la tip kyrteng u Bah Philimon, ba ki shim pisa na u haduh 3 lak tyngka.
Kane ka jingkynnoh ka la mih ha ka Youtube Channel jong u Bah PS Lyngdoh, kaba u Bah Philimon u la kynnoh ba kane ka kompani W. F Passah Pvt. Ltd, ka la shim pisa hauh 3 lak tyngka khlem pynphai shuh.
Lah ban kdew ba kane ka kompani ka ju shim ka pisa ban shna ïa ki kot jingdonkam na ki briew, kiba thmu ban shim loan na ki bank, bad ki ju pynleh ruh ïa kiba bun ki kam, ha kaba ki hap ba shim ka pisa bai leit bai wan bad ka bai pynleh ne shna ïa ki kot ki sla.
Haba kren sha ki lad pathai khuobr, u Ajay Thaba Director ka W. F Passah Pvt. Ltd u la ïathuh, ba u Bah Phili-mon u siew tang T.1.20 lak bad kata ruh ki la pynphai noh ïa u kumba 95 hajar bad kaba sah ka long sa ha ki 25 hajar eiei.
“Ngi la ong ïa u ban sa siew dep kane ka pisa suki suki, ym pat ba ngin bam duh ïakata ka pisa” u la bynrap.
Ka jingkynnoh kaba hapoh ka YouTube Channel kaba la ai kyrteng P.S. Lyngdoh lyngba ka jingïakren hapdeng u Bah Pynshailang Lyngdoh bad u Bah Philimon Nongpoh ha kaba u Bah Philimon u la kynnoh ba u Ajay Thapa, Director bad ka Kong Evangeline Pyngrope, Assistant Director ka W. F Passah Solution Pvt Ltd, Consultant for Services, ba ki dei ki nongthok pisa.
U la ong, ba ki khlem shim ïa ka kot khyndew u Bah Philimon bad kyntait ïa ka jingkynnoh ba ki shim pisa 3 lak tyngka ban pynkhreh ïa ki kot ki sla ban shim ram na Bank kaba 25 lak.
U la ong ba halor ki kot ki sla dulir kim ju shim bad dalade hi u Bah Philimon u la pynshai ha katei ka Youtube Channel ba ka dulir ka la don ha ka bank of Maharashtra.
Shuh shuh u Ajay Thaba u la ong ba ka jingkynnoh u Bah Philimon ïa ki, kadei namar um lah siew shuh ba u pan pisa na u wei u briew, kumta u kynnoh ïa ki ban pynshisha, ba ka pisa jong uta u briew ka don ha ki.
U la ong ba ka T.1.20 lak ruh ba ki shim kadei ban leh ïa ki kot ki sla bad ki la dep pynphai 95 hajar da kaba ong ba ki don ïa ki sakhi, kiba ki la dep ba Gpay.
Shuh shuh la ong ba u Bah PS Lyngdoh u dei ban ïakren shuwa bad ki ruh halor kane, ym ban shu thad kumto ha social media khlem tip ïa ka jingshisha, namar kane ka la pynthohbria ïa ki wat ha ïing hasem ruh kumjuh.
Ki nongshah kynnoh ki la pynpaw ka jingsngewkhia namar ba u Bah Pynshailang Lyngdoh u khlem wad jingshisha lang na ki, ha shuwa ban pyllait paidbah ïa ka jingïakren bad u Bah Philimon.
Shuh shuh ki la kyntait ruh ïa ka jingkynnoh, ba la kynnoh da ka Kong Robha Muktieh bad shim ba kadei ka jingpynjah burom ïa ki.
Nalor kane ki la pynpaw ba ki la dep ujor ‘defamation case’ ïa kine ki lai ngut bad kin pynïaid da ka mukotduma kaba dei bad ki kam pynthoh-bria khlem kino-kino ki jingshisha.
Na ka liang u Bah Kelius Sumer, u nongtrei katei ka kompani, u la ong ba baroh ki jingkynnoh pyrshah ïa ki nongïalam ha ka kompani, ki long kiba bakla bad kiba la shu thaw-nang suda.
