Shillong, Naitung 16
U Myntri Rangbah ka Sorkar Jylla u Conrad K Sangma u la ong ba ka Sorkar kan dang pynkhlaiñ ban pynrung kyrteng Adhaar bad ka e-KYC ha kylleng ka Jylla ban pynthikna ba ki nongïoh bynta kiba dei hok, kin ïoh ïa ki jingmyntoi na ki skhim Sorkar Pdeng bapher-bapher.
Haba pynïaid ïa ka jingïalang bishar bniah ha ka sngi Palei jong ka taïew bad ka tnad C&RD, tnad ka koit ka khiah, tnad Social Welfare, bad Food & Civil Supplies u Conrad u la bishar bniah ïa ka jinglong jingman ban pynrung kyrteng ha ka Aadhaar bad ka e-KYC ha kane ka Jylla.
Katkum ka jingbishar bniah, 77.02% na ki longïing kiba hap hapoh ka Meghalaya Health Insurance Scheme Pradhan Mantri Jan Arogya Yojana (MHIS-PMJAY) kiba la pynïasoh bad u Aadhaar, katba 57.13% ki nongïoh jingmyntoi shimet ki la pyndep ïa ka jingpynïasoh.
Hapoh ka NESA ka jingpyndep ïa ka e-KYC ha ka Jylla ka la kot sha ka 61.01%.
Ka jingïalang ka la rai ruh ban pynjur ïa ki jingpynsngewthuh paidbah bad ban pynlong shuh-shuh ïa ki jingpynrung kyrteng da ka jingkyrshan na ki bor synshar district bad ki tnad.
U Conrad K Sangma u ong ba ka Sorkar Jylla kan pynïar ha baroh ki kam ban ai jingkyrshan kaba donkam na ka bynta ki nongshong shnong na ka bynta ban pynrung kyrteng Adhaar bad e-KYC.
U la ong ruh, ba ki jingpyndep ïa kine ki jingdonkam ka long kaba donkam na ka bynta ki nongïoh jingmyntoi na ki skhim Sorkar Pdeng bad ba kin dangïoh shuh-shuh ki jingïarap.
