Shillong, Naitung 16
Ka Khun Hynñiewtrep National Awakening Movement (KHNAM) lyngba u Working President u Bah Thomas Passah ka la dawa ba ka Sorkar Jylla ka dei ban pynsangeh shwa ïa ka Tender ba la khot haba ïadei ban pyntreikam ïa ka Vehicles Scrapping Facilities.
Haba kren sha ki lad pathai khubor, u Bah Thomas u la ong ba ïa kane ka tender la khot hadien ba ka Sorkar Jylla ka la wanrah ïa ka Meghalaya Vehicles Scrapage Policy 2025, ha kaba kin sa don ki kali kiba hap die mar jot noh.
U ïathuh ba ka ophis Commissioner of Transport ha ka 18 tarik Jylliew 2026, ka la khot Tender ïa ki kompeni ba kin ïashim bynta ban pyntreikam ïa ka Vehicles Scrapping Facilities, hynrei haba pule bniah ïa kane ka Tender, la ïohi ba ka don ka jingpyrshang na ka Sorkar ban ai ïa ki Tender sha ki kompeni kiba nabar jong ka Jylla.
Nalor kata u la ïathuh haba peit ïa ki jingdonkam bad ki kyndon ban thep ïa ka Tender, ki long kiba eh bha ïa ki trai ri trai muluk ban biang katkum ka jingpan bad kane lehse ki la buh ïa ki kyndon ban khanglad ïa ki trai ri ban ïoh ïashim bynta ha ki Tender.
“Kawei na ki kyndon ka long ban ïoh ïa ki kot ki sla na ka Ministry of Road Transport & Highway ka Sorkar India, hap donkam ïa ka jingïadei ha Delhi bad kawei ka kyndon ka long ba kiba thep ïa ka Tender ka long ba ki dei ban don ïa ka kompeni, kane ka long kaba eh ïa ki Khasi ban pynïaid ïa ka kompeni ha ka Jylla,” ong u Bah Thomas.
U la kynnoh ba kane ka jingleh ka Sorkar ka lah ban dei ba ka la dep ban pynbeit lypa ha kaba rieh ban ai Tender ïa kano-kano ka kompeni baheh kiba na shabar ka Jylla. “Ka jingkyrduh kam ha ka Jylla kam dei shuh kaba dang thymmai, hynrei ka jingwanrah pat ïa kine ki kyndon, ka la khanglad ïa ki Khasi ban ïoh kam ïohjam,” u la ong.
“Ngi dawa ba ka Sorkar ka dei ban pynsangeh shwa ïa kane ka Tender bad kam dei ban ïaid shakhmat, ka seng kan sa phah ïa ka jingthoh sha ka ophis jong u Commissioner bad Transport,” u la bynrap.
Shuh-shuh u la ong, lada ka Sorkar ka pyrshang ban ai sha ki kompeni shabar, kane kan hap beit ha ka kam khaïi bad ka mut ba kine ki kompeni ki donkam ïa ka Trading Lisen na ka KHADC. U la ong ba na ka liang ka KHNAM kan sa phah jingthoh sha ka KHADC ban kyntu ba ym dei ban ai Trading Lisen ïa ki kompeni kiba pyrshang ban knieh ïa ka kamai bad ka kam kaba u Khasi u la lah ban trei.
