Ka jingïoh ïa ka surok four-lane kaba thymmai bad kaba dang shu dep ban shna na Umshyrpi sha Baniun ka la pynkmen bad pynsuk shibun ïa ki nongleit nongwan, ha kaba ka leit ka wan ka la kloi bad ruh ban lait na ka dheng kali kaba kum ki nongleit nongwan ki la ju mad ha ka surok rim, da kaba shong dheng kali da ki kynta kynta. Ka jingdep jong kane ka surok thymmai, ka la khate shibun ïa ka por ha ka leit ka wan sha ki thaiñ Upper Shillong, Mylliem ne Mawngap.
Kane ka surok thymmai kaba dang don tang katto katne bnai, dang ha kine ki khyndiat sngi bad taïew ka la paw pyrthei ym ha ka liang jong ka jingkmen bad suk ha ka leit ka wan hynrei ka jingbuh jingsyier bad jingma pynban. La ïohi ba ka bynta jong ka surok na lad Lum Mawbah sha jingkieng Umshyrpi ka la ngam bad pynlong ïa ki kali kiba ïaid ba ïeng ban kynthih bad mynta la paw sa ka jingor pait jong ka kynroh ha ka bynta jong ka jingkieng Umshyrpi, kaba la pynlong ïa ki nongleit nongwan ban syier mynsiem. Ka jinglong jingman jong kane ka surok bad na kine kiei-kiei kiba paw, ka pyni ba imat ka kompeni kaba pyntrei ïa kane ka surok, ka la shu trei tang dep bad trei torti. Ka projek kaba la kot da ki hajar klur tyngka, hynrei haba peit bad sakhi pat ha kane ka bynta kaba la trei torti, ym I kop shuh ka dor bad ka kam. Haba kumne mano ban hap shim ka jingkitkhlieh bad aiu ki bor ba dei khmih kin leh.
Ka long shisha kaba ithamula ba haba ka la don ka jingorpait kaba ima shisha namar lada jia ba ka twa, kan hap beit jlang sha riat hynrei ha ka jaka ban shim ki lad ban maramot ha ka rukom kaba dei hynrei la shu theh pynban tang da ka dewbilat. Haduh katno kan lah ban bat, namar ha ka jaka ba dang theh dewbilat ruh la ïohi ïa ka jingorpait. Ka tnad kaba dei khmih ka dei ban shimkhia mardor halor kane bad bthah ïa kiba pyntrei ban leh ïa kaba donkam ha ka rukom kaba dei bad kaba itynnad. Ym dei ban ap haduh ban da don kino-kino ki jingjia kiba sngewsih. Bun na ki paidbah ki la pynpaw ïa ka jingbym sngew shngaiñ lada ki kali kiba heh ki ïaid ha kine ki jaka, bad ka buh jingma ruh ba ha kano kano ka por ka lah ban khyllem. Ka jingkylli ka mih hato kane ka dei ba u kontraktor u trei torti ne dei na ka daw ba kane ka jaka kaba ki shu pyndap da ka kyndew kam pat skhem bad ka dang jem namar ka jingjur jong u slap ha kine ki khyndiat sngi.
Ka jingtrei torti ïa ki surok la ju sakhi ha kylleng ki bynta jong ka Jylla. Ka nuksa ka surok na Mawroh ba ïaid lyngba ka Mawkynroh bad mih sha Mawlai by-pass, ka dei ka surok ka bym pat da slem, hynrei tang la wan ka aiom slap, kane ka surok ka la julor bad dap da ki thliew ki syar. Ngi lah ban sakhi ruh ba ha kine ki bnai shwa ka jingïalang ka NEC ba la wan ïashim bynta da u Myntri ka tnad Kam Pohïing ka Sorkar Pdeng u Amit Shah, ka la don ka jingmaramot ban tap ïa ki thliew ki syar da kaba syrdep rong hynrei kane ka jingmaramot kam shym la neh satia tang hapoh shi bnai eiei, ka la jot rathai biang bad la sakhi biang ïa ka jingdap jong ki thliew ki syar, kaba ym tang ba ka la pynthut ïa ka leit ka wan hynrei ban buh jingma ruh. Hato kane kam dei ka jingtrei torti. Kumno ka surok kaba maramot tang shi bnai ruh kam neh. Balei ka tnad ba dei peit kam shimkhia halor kane, khamtam lei haba ka dei ka surok kaba ju ïaid bha ki heh ki haiñ wut shi wut.
