Shillong, Naitung 16
Ka jingleit ïashimbynta u Dr. Jemino Mawthoh, u MLA barim ka Nongthymmai bad General Secretary barim ka UDP ha ki prokram ba la pynlong da ka BJP ha kine ki sngi ka pyni ba ka la sdang ban don ka jingïadei kaba jan.
Kane ka prokram kaba u Dr. Jemino Mawthoh u la leit ban ïashimbynta ka dei ha ka 6 tarik mynta u bnai Naitung 2026 haba ka BJP ka la rakhe ïa ka jingdap 125 snem ka sngikha u Dr. Syama Prasad Mukherjee uba dei uwei u nongïalam ka BJP.
Haba pynthikna ïa kane, u Bah Wankitbok Pohshna uba dei u Secretary ka BJP Meghalaya State Unit u la ïathuh ba ka BJP ka la khot ïa u Dr. Jemino Mawthoh namar u dei u MLA barim bad ka jingwan jong u ha kane ka prokram ka la dang pynjan ïa ka jingïadei ka jong u bad ka BJP.
“Nga sngewkmen palat lada u Dr. Jemino un rung sha ka BJP namar kane ka seng ka dei kaba trei na bynta ka jingbit jingbiang jong ki paidbah,” u la ong.
U don jingkyrmen lyngba kum kine ki prokram kan pynktik ïa u ban rung sha ka BJP.
Kumban shu pynkynmaw hadien ba u Dr. Jemino Mawthoh u la mih noh na ka UDP, ym shym la ïohi shuh ban ïashimbynta ha ka kam saiñpyrthei hynrei mynta ki dak ki shin ki paw ba u lah ban rung sha ka BJP namar ka jingleit ïashimbynta ha ki prokram jong kane ka seng.
