Nongpoh, Naitung 16
Ka jingdawa ban pynïoh bailutksan sha ki longïing jong ki lai ngut ki heprit kiba khlad na ka jingshah bat bording ilektrik ha ka shnong Umtangling, Ri Bhoi District kala nang khlain bad nang sawa jur shuh shuh hadien ba na ka liang jong ka Synjuk ki Rangbah Shnong Ri Bhoi Mihngi ruh kala buh ïa kajuh ka jingdawa sha ka MeECL.
Haba shimkhia halor kane ka bynta, ka Synjuk hapoh ka jingïalam u Chairman, Bah P.B. Sylliang lem bad u General Secretary, Bah Ailong Pariat kila leit ban kynduh bad ai jingthoh syndon sha u Deputy Commissioner ka Ri Bhoi, u Dr. Abhishek Saini ban kyntu ba ka Sorkar ka dei ban pynsted ban siew ïa ka bailutksan sha ki longïing kitei ki lai ngut ki heprit.
U Bah P.B. Sylliang haba kren sha ki lad pathai khubor hadien ka jingkynduh bad u Deputy Commissioner ka Ri Bhoi, u la ong ba tang mar ïa ïoh jingtip halor katei ka jingjia kaba sngewsih, ka Synjuk mar mar kala hiar sha katei ka shnong ban leit sngewlem bad ai mynsiem ïa ki longïing kiba mad ïa katei ka apot sngewsih.
Utei u nongïalam u la ïathuh ba ka jingaiti ïa ka jingthoh sha u Deputy Commissioner ka Ri Bhoi ka dei ban dawa ba ka MeECL ka dei ban siew bailutksan sha ki longïing kitei ki lai ngut ki heprit kiba la duh noh ïa la ka jingim bad bynrap ba ka jingsiew baitlutksan kam dei satia ban ïa peiñ bad ka jingsngewsih kthang, ka jingpang mynsiem kitei ki longïing, hynrei ba kan long kum ka jingïarap ïa ki ha kum kane ka por kaba ki mad jingeh.
Ha kajuh ka por, ka Synjuk ka pynpaw ruh ïa ka jingsngewkhia jur ïa ka jingbym shimkhia ka MeECL ïa ka jingujor jong ka shnong. Kumba la ïoh jingtip, u Rangbah Shnong ka Umtangling u la leit ban ujor ïa katei ka jingap jingma ki sainar ilektrik naduh ka sngi Nyngkong, hynrei katei ka tnad kam shym la leh eiei ban shimkhia ban weng ïa kitei ki jingma kiba la ap lypa.
Halor kane ka bynta, ka Synjuk ka kyntu ïa u Deputy Commissioner ka Ri Bhoi ba un bthah ïa ki ophisar ba kin shimkhia bad ai jubab mar mar haba don kino-kino ki jingujor kiba ïadei khamtam bad ka jingshngaiñ ki paidbah nongshong shnong.
Ka Synjuk kala kyntu ruh ïa ka Sorkar bad ka MeECL ba ki dei ban pyndep noh mar-mar ïa ka jingsiew baitlutksan sha ki longïing kitei ki lai ngut ki heprit khlem da pynslem shuh bad ruh ban pynthikna ba kum kine ki jait jingjia kim dei shuh ban dang wan jia ha ki sngi bad ki por ban sa wan.
