Nongpoh, Naitung 16
Ki nongïalam jong ka shnong Umtangling kaba hap hapoh ki thaiñ Umroi, Ri Bhoi District ha ka sngi Palei kila dawa ba ka Meghalaya Energy Corporation Limited (MeECL) ka dei ban siew bai lutksan sha ki longïing jong lai ngut ki heprit kiba la duh noh ïa la jingim na ka jingshah bat bording ilektrik ha ka sngi Balang.
Kum ban shu pynkynmaw biang sa shisien, lai ngut ki heprit kiba kynthup ïa ki shipara, kata u John Paul Nonglang (13) bad u Hamepynshai Nonglang (11) lem bad u Prainingstar Mawlong (15) kila duh noh ïa la jingim hadien ka jinghap jong u sainar ilektrik 11kV katba ki dang ïaid ha lynti shnong hynnin ka sngi ha ka por kumba 2 baje eiei shiteng sngi.
U Bah B. Lyngdoh, Secretary jong ka shnong Umtangling haba kren sha ki lad pathai khunor, u la pynpaw ba ka shnong baroh kawei ka dap da ka jingsngewsih kthang haduh katta-katta halor ka jingduh noh ïa ki lai ngut ki mynsiem na ka jingshah bat bording ilektrik bad pyntip ruh kum kane ka jingjia, kam pat ju jia koit hapoh ka shnong ka thaw.
U la phah ruh ka khubor sngewlem sha ki bahaïing hasem jong kitei ki lai ngut ki heprit kiba la duh ïa la ka jingim, ba U Blei un ai ha ki ïa ka jingpyntngen ha kum kane ka khyllipmat kaba ki mad ïa ka jingsngewsih kthang.
U Bah B. Lyngdoh u la ong ruh ba na ka liang ka shnong ka dawa ba ka MeECL ka dei ban siew bailutksan sha ka longïing jong kitei ki heprit kiba la duh noh ïa ka jingim ba kordor naba kane jingjia ba sngewsih ka dei ka jingbym shimkhia katei ka tnad. U la ong ruh ba ka MeECL nangne shakhmat ka dei ban peitngor, pynthikna ba kum kine ki jingjia ba sngewsih kim dei shuh ban dang jia hapoh ka shnong ka thaw.
Utei u nongïalam shnong u la pyntip ruh ba hashwa jong katei ka jingjia ba sngewsih, na ka liang ka shnong ka la dep ban leit ujor bunsien sha ka MeECL halor ka jingshong synjor ki sainar ilektrik bad ka jingduh jong u Transformer ba ki hap ban shong dum, hynrei ka MeECL kam shym la shimkhia satia bad leh lyndet ïa kitei ki jingud jingnam ki jong ki tad haduh ba ka wan kane ka jingjia kaba sngewsih kthang, kaba lai ngut ki mynsiem kila duh noh ïa la ka jingim ba kordor.
