Ha ka Dorbar Synrai, yn wanrah ka Sorkar ïa ka ‘Resolution’ ban pyrshah tih ‘Uranium’: Conrad

Shillong, Naitung 17

U Myntri Rangbah ka Jylla, u Conrad K. Sangma ha ka Sngi Thohdieng u la ong ba ka Sorkar Jylla kan sa wanrah ïa ka rai (Resolution) halor ka jingtih ‘Uranium’ ha ka Dorbar Synrai ka ban long ha u bnai Nailar.

Haba kren sha ki lad pathai khubor, u Conrad u la pynpaw ba ka Ïingdorbar ka hap ban ïakynduh hashuwa ka 27 tarik u Nailar ban bud ïa kaei kaba la buh da ka Riti-Synshar ka ri – kata hynriew bnai hapdeng 2 tylli ki dorbar.

“Hooid, ka rai kan sa wan ha ka Dorbar ban wan, ka ban long ha u bnai Nailar. Ka 27 tarik u Nailar kan dei ka tarik hashuwa ba hap pynlong ïa ka Dorbar,” u la ong.

U la bynrap, “Kumta, ka por kaba hynriew bnai kan kut noh ha ka 27 tarik u Nailar. Kumta, ha ka Dorbar Synrai jong ka Ïingdorbar ka ban sa wan, dei hangta ba ngin sa wanrah ïa ka ‘Resolution’.”

Kumban shu kdew hangne, u Myntri Rangbah ka Jylla ha ka Sngi Palei u la pyntip ba ka Sorkar Meghalaya kan sa wanrah da ka ‘Resolution’ hapoh ka Ïingdorbar Thawaiñ ka Jylla, ban pyrshah ïa ka jingtih ‘Uranium’ hapoh ka Jylla.

Ha ka kyrwoh ba la pyllait lyngba ka durkhih, u Conrad u la ong ba ka Sorkar ba ïalam da ka National Peoples’ Party (NPP) ka ïeng skhem ha ka nongrim ban pyrshah ïa kano-kano ka jingthmu ban tih ïa u ‘Uranium’ ha Meghalaya.

“Nga la dep kren shai la bunsien ba ka Sorkar jong ngi ka pyrshah ïa ka jingtih ‘Uranium’ bad ngin pyrshah ïa kano-kano ka jingpyrshang ban ïoh tih ïa u ‘Uranium’ hapoh ka Jylla,” ong u Myntri Rangbah.

U la pyntip ruh ba u la dep shong jingïalang kaba bniah bad bun ki nongïalam ka NPP ha ka Sngi Balang. Ha ka jingïakren, ki nongïalam da kawei ka sur, ki la ai jingmut ba ka Sorkar Jylla bad ka Assembly ki dei ban mynjur da ka ‘Resolution’ ban pyrshah ïa ka jingtih ‘Uranium’.

“Halor kane ka jingai jingmut bad ka rai ba la shim da ki nongïalam ka NPP ha ka jingïalang, ngi la jam shakhmat bad ngi la pynkhreh ban mynjur da ka ‘Resolution’ ban pyrshah ïa ka jingtih ‘Uranium’ ha Jylla,” ong u Conrad.

U Myntri Rangbah u la pynpaw ïa ki jingsngewkhia halor ka jingktah ïa ka mariang bad ka imlang-sahlang ha lyndet kane ka rai.

“Ngi ïatip bha ïa ki jingktah ba bun jait kiba lah ban wan hap ha ki briew jong ngi, ha ka mariang, ha ki khlaw bad ka lawei jong ka Jylla. Ki don shibun ki jingma kiba ap hangne. Kumta, ngi la ïeng skhem ba ngin pyrshah ïa ka jingtih ‘Uranium’ ha ka Jylla jong ngi,” u la ong.

Kane ka jingpynpaw jong u Myntri Rangbah ka la mih hapdeng ki jingkylli halor ka nongrim jong ka Sorkar Pdeng haba ïadei bad ka kam tih ‘Uranium’ hapoh ka Jylla.

Haba kdew ïa ka jingwan ba dang shen jong u Myntri Khynnah, Dr. Jitendra Singh sha Shillong, u Conrad u la ong ba u Myntri u la pynshai sha ki lad pathai khubor ba ka Sorkar India kam pat shim satia ïa kano-kano ka rai halor ka jingtih ‘Uranium’ ha Meghalaya bad kane ka kam ka dang don hapdeng ka jingbishar.

“Ka jingkren jong u ka la shai bha ba ka Sorkar India kam pat rai eiei halor kane ka kam,” u la ong.