Shillong, Naitung 17
Ki katto-katne ki lanot kiba la shah thok pisa ha ki briew kiba la kam ïalade ba ki trei ha ka kompeni ka WF Passah Pvt. Ltd, ha ka sngi Thohdieng jong ka taïew, ki la leit ban ujor da ka ejahar ha Rynjah Police Station pyrshah ïa ki.
Haba ïoh ban ïakren bad u wei na ki lanot, kata u Bah Philimon u la ong ba mynta ka sngi ki la leit ban ujor FIR pyrshah ïa u Ajay Thapa bad ka Evanjeline Pyngrope, kiba la thok pisa da kaba ong ba ki mut ban ïarap pynïoh ram sha ki Shuh shuh u la ong, ba hashuwa ba ki lanot kin ïoh ïa ka ram, kine ki ar ngut ki riew shim kabu, ki la pan pisa hynrei ha ka jingshaniah la kum pdiang ïa ka jingbthah kine ki ar ngut ki riew shim kabu.
U Bah Philimon u la ong ba dangshen kine ki briew kata u Ajay Thapa u la kam ba u la dep ban siew ka pisa kumba 95 hajar tyngka sha une u rangbah bad ka sah sa tang 25 hajar eiei kaba dangsah, hynrei na ka liang une u rangbah um pdiang satia ïa ka jingkren jong u Ajay bad ong ba kim pat ïoh ïa kata ka pisa, hadien ba ki la dep ruh ban update ïa ka passbook.
“Ka pisa kaba u Ajay Thapa u la dep phah kadei tang 65 hajar kaba nga la ïoh hynrei kata ka jingkam ba la dep siew 95 hajar kadei kaba la shu thok,” u la ong
Shuh shuh u la ong ba baroh ka pisa ba u la ai sha kine ki briew ka la poi sha ka 3 lak tyngka, hynrei ka pisa ba ki dang pynphai kadei tang 65 hajar.
U Bah Philimon u la pynshai ba nalor ka pisa 3 lak tyngka, ka dulir ruh ryngkat ka jaka ba 44 akar la dep ban ai sha u Ajay Thapa. “U la kular ban pynïoh ram hynrei haduh mynta ruh ngam pat ïoh bad ka pisa ruh u dangpynphai tang 65 hajar.”
Na ka liang ka Kong Robha pat, haba bynrap ka la ïathuh ba kine ki ar ngut ki riewshim kabu ki la shu ai daw ba kim ïoh ban phone bad ki la shu switch off ïa ka phone da ki sngi.
“Hadien kane nga la byrngrem ban ujor sha ki pulit bad ki la phah ka pisa hynrei kim shym la phah lut ka pisa bad ki la shu screenshot thok, ba ki la dep siew hynrei sha ka bank jong nga pat kam shym la poi,” ka la ong.
