Shillong, Naitung 19
Haba phai sha ka National Eligibility-cum-Entrance Test (NEET) UG 2026, ka Meghalaya ka la sakhi ïa ka jinghiar kaba khyndiat eh ha ka jingdon jong ki samla pule kiba la seisoh ha kane ka eksamin, hynrei ka Jylla ka ïai bteng ban mad ïa kawei na ki jingeh kaba khraw tam ha ka ri-ka jingduna kaba jur ha ka liang ki ‘seat’ MBBS haba ïanujor bad ka jingdon jong ki samla kiba la poi sha ka thong ha kane ka eksamin.
Katkum ka jingtip na ka National Testing Agency (NTA), ki don 1,658 ngut ki samla na Meghalaya kiba la seisoh ha ka NEET UG 2026 na ki 3,425 ngut kiba la ïakhun; kata, 48.4% ha ka jingdon jong kiba ‘pass’.
Kane ka jingkheiñ ka la hiar tang khyndiat na ka 1,681 ngut kiba la seisoh ha u snem ba la dep, kaba kdew ba ka jingleh bha jong ka Jylla ka long kaba ïaineh wat hapdeng ka jingjwat jong ka eksamin bad ki ‘cut-off’ kiba heh ha ka ri baroh kawei.
Ka jingjop kaba khraw tam jong ka Meghalaya mynta u snem ka la wan ha ka dur jong u samla Bakhambok Anthony Thabah, uba la paw kum u ‘Topper’ ha ka Jylla da kaba ïoh ruh ïa ka All India Rank (AIR) kaba 14,455 bad 99.26791%, kaba pyni ba ki samla pule ka Jylla ki lah ban ïa aireng bad kiba tbit tam wat hapdeng ka jingduna ha ka liang ka jingai jinghikai.
Ka Meghalaya baroh kawei ka don 144 tylli ki ‘Medical Seat’ na ka bynta ka Jylla.
Hynrei haba ïanujor bad katto-katne kiwei pat ki Jylla, ka pynpaw ïa ka jingïapher kaba khraw ha ki lad ki kabu kiba ki don na ka bynta kito kiba kwah ban pule doktor.
Ki Jylla kum ka Rajasthan ka la sakhi ïa ka jingseisoh kaba heh tam ha ka ri (ha ka jingdon kiba ‘pass’), kaba long haduh 69%, kaba pyni ïa ka jingktah jong ka rukom ai jinghikai bad ka jingdon jong bun bah ki ‘Medical College’.
Ka Assam ka la pynmih ruh ïa u samla uba la lehbha tam ha ka Thaiñ Shatei Lam Mihngi, ha kaba u Shubh Prasad u la ïoh ïa ka AIR-133, kaba pynpaw ïa ka jingnang roi jong ka mynsiem ïakhun hapoh ka thaiñ.
Ym kumba long ha kiwei pat ki Jylla kiba kham heh kiba la pynïar ïa ki lad pule doktor jong ki ha kine ki khyndiat snem ba la dep, ka Meghalaya baroh kawei ka don tang 144 tylli ki ‘seat’ MBBS ha NEIGRIHMS bad Shillong Medical College, ha ryngkat ki samla pule na ka Thaiñ Shatei Lam Mihngi bad ka ‘All India Quota’, kaba iehnoh pat ïa ki hajar ngut kiwei pat ki samla kiba la pyntbit ban ïakhun na ka bynta ki ‘seat’ kiba duna eh.
Ka jingïapher hapdeng ka jingangnud bad ka lad ka kabu ka long kaba phylla. Katba 1,658 ngut ki samla pule ki la seisoh ha ka NEET, tang khyndiat ngut eh ha kaba kut kin ïoh ïa ka ‘Medical Seat’ Sorkar hapoh ka Jylla.
Kumta kiba bun kin hap ban phai khmat shabar jong ka Meghalaya, la ka long lyngba ka ‘All India Quota,’ ki ‘Medical College’ shimet ne ki jaka pule ha kiwei pat ki Jylla, kaba bunsien ka kynthup ïa ka jinglut kaba kham heh.
Ka jingeh kam dei tang ha Meghalaya, hynrei ka kham paw ban ha ki Jylla kiba don bun ki ‘Medical College’ Sorkar. Ka Rajasthan, Uttar Pradesh, Tamil Nadu bad Karnataka ki la pynkiew suki-suki ïa ka jinglah ban shim ïa ki samla katba dang mih ki snem, kaba pynlah pat ïa ka bynta kaba kham heh jong ki samla kiba seisoh ban bteng ïa ka jingpule MBBS hapoh ki Jylla lajong.
Ka jingkiew ha ka NEET ‘cut-off’ ha ka ri mynta u snem ka la nang pynjur shuh-shuh ïa ka jingïakhun. Da ka jingdon jong kiba bun ki samla kiba ïoh bun ‘mark’ ha kylleng ka ri, ka jingïakhun ïa kane ka eksamin tang ban shu lait salit kam biang shuh ban ïoh rung sha ka ‘Medical College’ Sorkar.
