Shillong, Naitung 19
U MLA ka Bharatiya Janata Party na Pynthorumkhrah u Bah Alexander Laloo Hek u la kynthait ïa ka jingkynnoh kaba ong ba ka Sorkar India kan thom da ka bor ban khlong ïa u marpoh khyndew (Uranium) ba don hapoh ka Jylla Meghalaya.
Haba kren sha ki nongthoh khubor u Bah Hek u la ong ba ka jingkren u jong u Myntri Khynnah ka Sorkar Pdeng u Jintendra Singh, ka long ba u ong ba ka Sorkar India kam pat shim ïa kano-kano ka rai ban tih ïa u Uranium, “Ka dang dei tang ka jingpyrkhat bad lada ki paidbah jong ka Jylla kumjuh ka Sorkar Jylla ki shah bah tih Uranium, ka Sorkar Pdeng kan tih, hynrei lada ki paidbah bad ka Sorkar Jylla kim shah ban tih, ka Sorkar Pdeng kan ym leh da ka bor bad ka dei ruh kaba ymlah long” u la ong.
Shuh-shuh u la ong ba ka BJP ruh ka don ha ka Sorkar MDA-II kaba la ïalam da ka sengsaiñ pyrthei National People Party (NPP) bad ka BJP ruh ka don kajuh ka jingmut ban ong ïa ka Sorkar ba ka dei ban mynjur da ka ‘Resolution’ kaba long katkum ka jingkwah jong u paidbah ban nymshah ban khlong ïa u Uranium hapoh ka Jylla.
Kum ban shu kdew ba ha ki khyndiat sngi ba la dep ka Khasi Students’ Union ka la kam ba ka Sorkar India ka pyrkhat ban tih ïa u Uranium ha ka Jylla Meghalaya bad ka KSU ka la suba jur ruh ïa kane hadien ba ka la kam ba ka ïoh jingtip ba ki la don ki heh spah kiba la sdang ban leit thied jaka ha ka thaiñ ba don u Uranium, khnang ba kan long ka jingplie plielad ïa ka jingtih Uranium.
Ka KSU ka la pynpaw ruh ba da lei lei kan nym ailad ban khlong ïa u Uranium ba ha ka Jylla bad ka la dawa ruh ïa ka Sorkar Jylla ba ka dei ban mynjur da ka ‘Resolution’ hapoh Ïingdorbar thawaiñ ka Jylla, ba ym dei ban shah ban ïa ka Sorkar India ban tih ïa u Uranium.
Shuh-shuh ka Sorkar Jylla lyngba u Myntri Rangbah u Conrad K Sangma ha ka 16 tarik Naitung 2026 u la pyntip ba ka Sorkar ka la rai ban wanrah da ka jingmynjur ïa ka ‘Resolution’ ban pyrshah ïa ka jingtih Uranium ha ka Jylla ha ka Dorbar ban wan.
