Shillong, Naitung 19
Ki kam tuh kam thiem ki dang ïai bteng na kawei ka sngi sha kawei pat bad ïa kane lah ban sakhi na ki jingjia shah tuh ki arshaka, shah prong tuh ki ïing bad ki kali ka dang ïai jia ha kylleng ka nongbah Shillong bad wat sha kiwei ki bynta jong ka Jylla ruh kumjuh.
Katkum ka khubor kaba la ïoh na ki pulit la ong ba u Eddie Erison Kharkongor u la ai ka jingujor ba ha ka 14 tarik mynta u bnai, ha ka por kumba 4.30 mynstep, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-V-2936 na ka jaka sah ka jong u, kaba don ha Lower Mawprem Pdengshnong, Shillong.
Na ka liang jong u Biden K Sangma u la ai ka jingujor ba hapdeng ka 13 bad 14 tarik mynta u bnai, ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AH-0190 na ka jaka sah ka jong u, kaba don ha Mawlai Nongpdeng, Block-B, Shillong.
Ha kawei pat ka khubor, ka Kong A Chyne ka la ai ka jingujor ba ha ka step jong ka 14 tarik mynta u bnai, ki runar bym lah ban ithuh ki la prong tuh hapoh ka ïing jong ka, kaba don ha Mawlai Nongmali-III, Shillong bad ban tuh kawei ka mobile phone, lai tylli ki jingdeng ksiar, ka pisa T.2,000/-, kawei ka card ATM bad kiwei kiwei ki tiar.
Na ka liang jong u Rajesh Rampal u la pyntip ba ha ka 13 tarik mynta u bnai, ki runar bym lah ban ithuh, ki la tuh ïa ki sainar ilektrik bad uwei u switch box na kawei ka jaka kaba dang don ka jingpyntrei ha Kench’s Trace, Bishnupur, Shillong.
Ha kawei pat ka khubor u Hamebansan Kharjahrin u la ai ka jingujor ba ha ka 14 tarik mynta u bnai ha ka por kumba 2 baje dang step, ki runar bym lah ban ithuh ki la tuh ïa ka arshaka ka jong u, kaba don ïa u registration number ML10-C-8515 na ka jaka sah ka jong u, kaba don ha Umsaitsning Nongpdeng (RB).
Ha kawei pat ka khubor ha ka 15 tarik mynta u bnai, ha ka por kumba 7.30 mynstep, u Sopon Ch Sangma u la ujor da ka ktien ba ki runar bym lah ban ithuh, ki la prong tuh hapoh ka dukan ka jong u, kaba don ha Chandmari Bazar, Tura (WGH) ha kaba ki la tuh ïa ki sikret bad pisa khutia.
