Shillong, Naitung 20
U National Working Presi-dent ka National People’s Party (NPP) bad nongmihkhmat barim ka Dadenggre, u James P.K. Sangma, ha ka Lah Sngi U Blei, u la bam smai kum u MP ka Rajya Sabha jong ka Meghalaya.
Ïa u James la pyntian smai da u Chairman ka Rajya Sabha, u C.P Radhakrishnan ha ka ktien ‘Hindi’.
Ha kajuh ka por, la synran lang ïa u da u para jong u, uba dei ruh u Myntri Rangbah ka Jylla, u Conrad K. Sangma, ha ryngkat ka jingdonlang kiwei pat ki nongïalam ka seng.
Ha ka jingthoh kaba la buh ha ‘X’, u Myntri Rangbah ka Jylla, u Conrad K. Sangma u la ong, “La synran lang ïa u hynmen jong nga, u Shri @JamesSangma1 ha ka por jong ka jingïalang bam smai kum u MP ka Rajya Sabha na Meghalaya. Ngi kitbok-kitrwiang ïa u ba na ka bynta kane ka kam bathymmai jong u. To un long ka sur jong ki briew jong ngi bad un ïai bteng ban noh synñiang ha ka rukom kaba kit jingmut sha ka Jylla bad ka ri jong ngi.”
Ka NPP ka la ai khublei ruh ïa u nongïalam jong ka halor katei ka jingkitkhlieh bathymmai ba la bynshet ha u.
“Ka jingai khublei kaba khraw ïa u James Pangsang K. Sangma uba la bam smai kum u dkhot Rajya Sabha ba dang shah jied thymmai na Meghalaya,” la thoh ka seng ha ka ‘Post’.
“Ka jingkitbok -kitrwiang ïa u ba un ïoh ka bor, ka jingstad, bad ka jingjop baroh haba u rah ïa ka sur bad ki jingangnud jong ki paidbah ka Meghalaya sha ka rynsan ba hakhlieh duh jong ka ri,” u la thoh.
Kumban shu kdew hangne, u James Sangma, uba la long teng u MLA la ar sien na Dadenggre bad Myntri Sorkar barim ka Jylla, u la shah jied khlem don ba ïaleh pyrshah sha ka Upper House ha u bnai ba la dep.
