Shillong, Naitung 20
Ki nongtrei Muster Roll kiba trei ha ki kam bapher-bapher hapoh ka tnat Public Health Engineering (PHE) jong ka Sorkar Jylla ha ka 20 tarik u Naitung da ki spah ngut ki la leit tur kynsan ha ka ophis u Chief Engineer (CE) ka tnat, ban dawa pyllait noh ïa ka bainong trei jong ki kaba la sahkut naduh u bnai Ïaïong 2026.
Ha kane ka jingleit tur paidbah ha ophis ka tnat PHE, ki nongtrei Muster Roll ki la rah ryngkat ki plakad ba don ki jingthoh ba dawa na ka tnat ba ka dei ban pyllait noh ïa ka bainong bad thoh ruh kumno kin trei ïa ka kam khlem ïoh ïa ka bainong bad kumno kin kyrshan ïa ka ïing ka sem, hynrei haba la poi ha katei ka ophis la shem ba u Chief Engineer lane ki Additional Chief Engineer kim don satia, kumta na ka liang ki nongïalam ki Muster Roll ki la buh da ka jingthoh ha ka ophis.
Haba kren sha ki nongthoh khubor, u Bah Khroo L Pariat, u nongaibuit ka All Meghalaya Muster Roll Progressive Workers Union (AMMRPWU)u la pynpaw ka jinglyngngoh ba ka tnat Finance ka la dep ban pyllait pisa pynban ka tnat PHE kam siew ïa ka bainong jong ki nongtrei Muster Roll.
U la ong ba ki nongtrei Muster Roll ki la ai por haduh ka 31 tarik u Naitung 2026 ba ka tnad kan pyllait ïa ka pisa kaba dei ka bainong jong ki, lymda ka long kumta naduh ka 03 tarik u Nailar 2026 kin sdang ka jingïakhih da kaba kin sangeh treikam.
Haba kylli ïa ka jingbun paid ki nongtrei Muster Roll kiba trei ha ka tnad, u Bah Khroo u la ong ba kim don jingkheiñ satia bad lehse ka jingbym don ka jingkheiñ jingdiah ïa ki Muster Roll ka lah ban dei ka daw ba khlem pyllait ïa ka bainong jong ki.
