Shillong, Naitung 20
Ka kynhun ki nongshet ja skul ka Jylla kiba don hapoh ka shatri jong ka Cook Cum Helper (CCH) PM POSHAN (Mid Day Meal) ki la kyntu ïa ka Sorkar Pdeng ba kan buh hakhmat ha ka Dorbar Thawaiñ ka Ri ban ïakren ïa ka jingdawa jong ki ban pynkiew ïa ka jingsiew lane ka Honorarium jong ki.
Kum ban shu kdew ka jingdawa ka CCH ïa ka Sorkar Pdeng ka long ban pynkiew noh ïa ka jingsiew jong ki na ka T.900 sha ka T.9000.
Haba kren sha ki nongthoh khubor ha ka lah sngi u Blei ka President ka CCH ka Kong Gina Nengnong ka la ïathuh ba kane ka jingsiew jong ki ka la neh mynta la palat 20 snem, hynrei ka Sorkar Pdeng kam shym la pynkiew khyndiat ruh bad haduh mynta ka dang neh sah tang T.900.
Haba ïadei ka jingsiew ïa ki nongshet ja skul, ka la ïathuh ba ka Sorkar Pdeng ka dei ban siew 90% katba ka Sorkar Jylla ka siew 10% kaba long tang T.100 ha ka shibnai, ïa kaba na ka liang ha Sorkar Jylla ka la pynkiew sha ka T.1,100 ha ka shi bnai.
Ka Kong Nengnong ka la kyntu ïa ka Sorkar Pdeng ba ka dei ban pynkiew ïa ka jingsiew jong ki. “Namar ka jingkiew dor jong ki marbam mardih, ngi kyntu ïa ka Sorkar Pdeng ba kan pynkiew noh na ka T.900 sha ka T.9000,” ka la ong.
“Kane ka skhim ka ïarap bha ïa ki longïing kiba duk kiba kyrduh lyngba ka ja sngi kaba ki ïoh man ka sngi ha Skul bad ka long ruh kumba khring ïa ki khynnah ban wan tista sha skul” ong ka Kong Nengnong.
Ka la ïathuh ba ka jingdawa jong ki, ka dei kaba la slem ha kaba ki la phah jingthoh bad ïakynduh ïa u Secretary ka tnat Pule Puthi ka Sorkar Pdeng bad ka jubab ba ki ïoh ka long kaba don jingkyrmen bad sngew kumba 80% kane ka kam ka la ïaid.
Ka Kong Nengnong ka la ïathuh ba mynshwa ka jingsiew ki ïoh man u bnai, hynrei mynta la saw bnai ba kynthup naduh u bnai Ïaïong, kim shym la ïoh ïa ka jingsiew bad ka la kyntu ïa u Myntri Rangbah ka Jylla ban shimkhia ïa kane.
