Shillong, Naitung 20
U Secretary ka Meghalaya Pradesh Congress Committee (MPCC), u Bah Manuel Badwar ha ka sngi Nyngkong jong ka taïew u la leit ban ïashim bynta ha ka jingïakhih ki samla pule ha Don Bosco Square, Laitumkhrah, ban pynpaw ka jingkyrshan jong ka Congress ïa ki jingdawa na ka Sorkar Pdeng ban shim ka jingkitkhlieh halor ka jinglait tuh ki kot jingkylli examin NEET bad ka jingdawa ban wan ka jingkylla ha ka pule puthi hapoh ka ri.
Haba kren sha ki lad pathai khubor, u Bah Manuel u la ong ba kane ka jingïakhih ka pyni ïa ka jingbitar kaba nangkiew hapdeng ki samla pule, kiba la shah pynthut ka lawei jong ki, ha ka pule puthi namar ka jingbym shimkhia bad bymkitkhlieh ka Sorkar Pdeng.
“Ngi don hangne ban pyni ïa ka jingkyrshan bad jingïatylli bad ki Samla pule,” u la ong.
“Kane kadei ka por kaba kongsan bha. Ka jingsngewsih hapdeng ki samla, khamtam ki samla pule kaba ka lawei jong ki, ka la shah ktah ha ki jingleh bym suidñiew jong ka Sorkar Pdeng. Ka saiñ pyrthei ka don ka bynta kaba khraw ha ka pule puthi, bad na ka bynta ka Sorkar ban kheiñ ïa kane ka kam ka jingkitkhlieh kaba rit, ka long kaba bakla,” u la ong.
U Bah Manuel u la ong, ba ka jingïakhih kam dei shaphang ka saiñ pyrthei, hynrei ka dei shaphang ka jingduh jingkyrmen jong ki samla pule.
“Kine kidei ki samla kiba la nang la stad bha, ha ka jingshisha kim kwah ban mih sha surok kumne hynrei ki sngew ba ki la shah leh beiñ ha ka Sorkar. Ki longïing kiba phah skul ïa ki khynnah ruh ki sngew ba ki la shah leh tohmet, namar ka jingbym shimkhia ka Sorkar Pdeng. Haba phi lehkai bad ki polisi, ka pynmih ïa ka jingduh jingkyrmen ïa ki samla pule ha ka pule puthi kaba ka Sorkar ka paw ba kam shimkhia,” la bynrap u Bah Manuel.
Haba ïadei bad ki jingdawa hiar shuki u ïa Myntri ka tnad pule puthi ka Sorkar Pdeng, u Bah Manuel u la ong ba ka Sorkar Pdeng kam shym la lah ban ai jubab ïa ki samla pule ba ïakhih.
“Kane ka batai ïa ka lawei jong ka ri jong ngi, ka Jylla jong ngi, bad ka imlang sahlang jong ngi. Ka Sorkar kam lah ban shu iehnoh ïa ka bad ban ïai bteng ban leh ïa ki kam ha la ka jong ka jong ka rukom. Ka pyni ba ka jingpule lehse kam dei ka mat treikam jong ka Sorkar Pdeng” u la ong. U la ong ruh ba donkam kyrkieh ban wanrah ka jingkylla ha ka pule puthi ha baroh kawei ka ri India.
“Ka rukom treikam ha ka pule puthi ka donkam ban pynkylla dur bad ban thaw thymmai. Lada ngim leh kumta, ngin ïai duh ïa ki pateng. Ka spah pyrkhat kaba ngi dei ban ïoh na ka jingnang jingstad kan ym wan satia. Ha kane ka juk mynta, ka jingnang jingstad ka long ka pdeng jong ka roi ka par bad ka imlang sahlang,” u la ong.
U la pynshai ba ki nongïalam ka MPCC, ki wan ban kyrshan ïa ki samla pule ym na ka liang ka Congress hynrei ki wan kum ki riew shimet kiba don ka jingsngewkhia na ka bynta ki samla pule.
“Ngi ïeng ryngkat bad ki samla pule bad ryngkat bad ka ri baroh kawei. Ki seng saiñ pyrthei ba don ha ka liang pyrshah ha Delhi, ki shim khia halor kane ka mat bad ngi ngeit ba u wei pa u wei u nongshong shnong, u dei ban kyrshan ïa ki,” u la bynrap.
