Shillong, Naitung 20
U Chief Electoral Officer (CEO) ha ka Lah Sngi U Blei u la ong ba ka Jylla ka la kynjoh 97.57% ha ka jingsam ïa ki ‘Enume-ration Form’ hapoh jong ka Special Intensive Revision (SIR)-2026 jong ka thup kyrteng ki nongthep ‘vote’.
Katkum ka ‘Status Report’, haduh ka 20 tarik Naitung, baroh ki don 22,92,576 ngut na ki 23,49,645 ngut ki nongthep ‘vote’ kiba la ïoh ïa ki ‘Enumeration Form’.
Haba phai pat sha ki lad pynïasoh ‘digital’, ki phorm ba la dep ban pynrung ki long 56.08%, ha kaba 12,73,894 tylli ki phom la dep ban pynrung lyngba ki lad pynïasoh ‘digital’.
Ïa kane ka SIR la pynlong ha kylleng ka Jylla ba la khmih da 3,551 ngut ki Booth Level Officer (BLO).
Katkum ka kaiphod jong u CEO, ka South West Garo Hills ka la sakhi ïa ka jingsam ‘Enumeration Form’ kaba 100%, bud sa ka South West Khasi Hills – 99.98% bad ka East Garo Hills – 99.83%.
Haba phai sha ka bynta jong ka ‘Digitization’, ka South West Khasi Hills ka lamkhmat da 74.17%, bud sa ka West Khasi Hills – 73.79% bad ka East Jaiñtia Hills – 71.55%. Ka East Khasi Hills, kaba dei ka distrik kaba bun briew tam ha kaba ki don 6,32,146 ngut ki nongthep ‘vote’, ka la sakhi ïa 93.09% ha ka jingsam hynrei tang 35.01% lyngba ki lad pynïasoh ‘digital’ haduh mynta.
Ka Election Commission ka Ri India ka la buh ïa ka 29 Naitung, 2026 kum ka tarik bakhatduh ban pynpoi ïa ki ‘Enumeration Form’.
“Ka sah sa tang 10 sngi ban aiti ïa ki ‘Enumeration Form’,” la ong u CEO, da kaba kyntu ïa ki nongthep ‘vote’ ban aiti ïa ki phom da kaba ai sha ki BLO jong ki ha ka por ba ki wan rung ïing ne da kaba ‘Upload’ lyngba ka ‘ECINET App’.
U CEO u la ong ruh ba baroh 3,551 tylli ki bynta jong ka EF la lah ban ‘download’ da ki BLO, bad ka jingsam na kawei ka ïing sha kawei pat ka dang ïaid shaid-shaid ha kylleng ka Jylla. Shuh shuh la pyntikna ïa ka jingpynïasoh lyngba ki lad ‘digital’ ban pyndep ïa ka kam katkum ka jingbuh por jong ka ECI.
“La kyrpad ïa ki nongthep ‘vote’ ki bym pat ïoh ne aiti ïa ki ‘Enumeration Form’ ba kin ïatreilang bad ki BLO ha ka por ba ki wan mih sha ïing bad ban pyndep kloi ïa ka kam katba lah,” la bynrap shuh shuh ka kyrwoh.
