Mawkyrwat, Naitung 20
Hadien 16 sngi eiei ba ka Kong Joit Kharlyngdoh, kaba la 76 snem ka rta ka la jah, ha ka sngi Nyngkong la lap noh ïa ka metïap jong ka, na kawei ka khlaw kaba don ha Jakrem.
Katkum ka khubor la ong ba ki briew ka shnong Jakrem kiba leit ban wad tit ha ka nohphai sngi jong ka 20 tarik u Naitung, 2026, ki la lap noh ïa ka met jong ka Kong Joit kaba la jah naduh ka janmiet jong ka 4 tarik u Naitung, 2026 na kawei ka khlaw kaba hap hapoh ka shnong Jakrem kaba tip kum ka Motbih Pamske.
Lah ban kdew ba ka jingjah jong ka Kong Joit Kharlyngdoh, na ka shnong Jakrem, South West Khasi Hills District ka la kynjoh mynta la 16 sngi naduh ba ka la jah bad naduh katei ka por ka khlem wan phai shuh sha ïing.
Katkum ka jingïathuh jong u Myntri Shnong Jakrem, Bah Pascal Wahlang u la ïathuh ba naduh ba ka la jah, kum ka shnong ki la ïa mih paidbah ban wad ïa ka naduh katei ka sngi ha ryngkat ka jingïatreilang bad ki bor pulit hynrei kim shym la lap.
U la ïathuh ruh ba ha ka 15 tarik mynta u bnai, ki paidbah nongshong shnong ryngkat ka jingïatreilang bad ki bor pulit ki la pyrshang ban phah wad lyngba ki ksew kiba la shah hikai hynrei kim lap satia ïa ka bad dei tad ha ka por mynsngi jong ka 20 tarik mynta u bnai ha ka por kumba 2:30 eiei la lap noh ïa ka metïap jong ka Kong Joit Kharlyngdoh da ki briew kiba leit wad tit bad mar mar ki la pyntip sha ki bor shnong bad pulit bad ka jingtohkit halor kane ka jingjia ka la ïaid shakhmat.
